محسن نقوی کا بیرسٹر گوہر سے رابطہ، اسلام آباد میں دھرنے،ریلی کی اجازت دینے سے انکار

امن وامان کا مسئلہ،25نومبر کو بیلا روسی صدر اسلام آباد آرہے ہیں، وزیر داخلہ …… پارٹی سے مشاورت کے بعد رائے سے آگاہ کروں گا، چیئرمین پی ٹی آئی
اسلام آباد (الفجر آن لائن) وفاقی وزیر داخلہ محسن نقوی نے چیئرمین پی ٹی آئی بیرسٹر گوہر کو اسلام آباد میں دھرنے یا ریلی کی اجازت نہ دینے بارے فیصلے سے آگاہ کردیا۔ ذرائع کے مطابق ہفتہ کو وزیر داخلہ محسن نقوی نے چیئرمین پی ٹی آئی سے ٹیلیفونک رابطہ کیا اور اسلام آباد ہائیکورٹ کے حکم کی روشنی میں موجودہ صورت حال پر تبادلہ خیال کیا۔ انہوں نے کہا کہ ہم اسلام آباد ہائی کورٹ کے حکم کے پابند ہیں، کسی جلوس،  دھرنے یا ریلی کی اجازت نہیں دے سکتے۔

وزیر داخلہ نے بیرسٹر گوہر کو بیلاروسی صدر کی قیادت میں اعلی سطحی 80رکنی وفد کی 24 سے 27نومبر کی مصروفیات و تفصیلات سے بھی آگاہ کیا۔ انہوں نے بتایا کہ بیلاروس کا اعلی سطح وفد (آج) اتوار24نومبر کو  اسلام آباد پہنچ رہا ہے جبکہ بیلاروسی صدر 25نومبر کو پاکستان پہنچیں گے۔انہوں نے کہا کہ اس موقع پر امن وامان کا قیام وفاقی حکومت کی اولین ترجیح ہے۔ بیرسٹر گوہر نے کہا کہ اس حوالے سے  پارٹی میں مشاورت کے بعد حتمی رائے سے آگاہ کروں گا۔