امن وامان کے قیام، شہریوں کی جان املاک کی حفاظت کیلئے ہر ممکن اقدامات کریں گے، پولیس اہلکار حفاظتی سامان پہن کر فرائض سرانجام دیں، وفاقی وزیر داخلہ
اسلام آباد (الفجر آن لنیپ)وفاقی وزیرداخلہ محسن نقوی نے پولیس افسران و اہلکاروں کو ہدایت کی ہے کہ اس بار قانون ہاتھ میں لینے والے کسی شخص کو واپس جانے نہ دیا جائے، امن وامان کے قیام، شہریوں کی جان املاک کی حفاظت کیلئے ہر ممکن اقدامات کریں گے، پولیس اہلکار حفاظتی سامان پہن کر فرائض سرانجام دیں۔ہفتہ کو وزیر داخلہ محسن نقوی نے علی الصبح پولیس لائنز کا دورہ کیا اور قیام امن کیلئے اسلا م آباد پولیس کی جانفشانی کی تعریف کی۔اس موقع پر آئی جی اسلام آباد پولیس، چیف کمشنر، ڈی آئی جی اور پولیس افسران کی بڑی تعداد موجود تھی۔وزیر داخلہ نے کہا کہ (آج) اتوار کو بیلاروس کا وفد اور 25نومبر کو بیلاروس کے صدر پاکستان کا دورہ کر رہے ہیں، دورے کے پیش نظر اسلام آباد کو ہر صورت محفوظ رکھنا ہے۔
انہوں نے کہا کہ کسی کو اسلام آباد میں امن و امان کی صورتِ حال خراب کرنے کی اجازت ہر گز نہیں دیں گے،امن و امان کو قائم رکھنے،شہریوں کی جان و املاک کی حفاظت کیلئے ہر ممکن اقدامات کریں گے۔انہوں نے ہدایت کی کہ قانون ہاتھ میں لینے والے کسی شخص کو واپس جانے نہ دیا جائے۔ وزیر داخلہ نے کہا کہ ہم آپ کے ساتھ کھڑے ہیں اور ہمیشہ ساتھ کھڑے رہیں گے۔انہوں نے کہا کہ ہمیں آپ اور آپ کی زندگیاں بہت عزیز ہیں۔ انہوں نے پولیس افسران و اہلکاروں کو دوران ڈیوٹی تمام حفاظتی سامان پہننے اور احتیاطی تدابیر اختیار کرنے کی ہدایت کی۔ انہوں نے کہا کہ فورس نے ایک ٹیم کی طرح مل کر کام کرنا ہے اور اسے یقینی بنانا ہے۔ انہوں نے کہا کہ پولیس اہلکار ہیلمٹ اور حفاظتی جیکٹس پہن کر فرائض سر انجام دیں۔
