یوم دفاع پاکستان کی مناسبت سے اور بابائے قوم قائداعظم محمد علی جناح کو خراج عقیدت پیش کرنے کے لیے آج مزار قائد، کراچی پر تبدیلی گارڈز کی تقریب کا انعقاد کیا گیا۔ پاکستان ایئر فورس اکیڈمی اصغر خان کی 7 خواتین کیڈٹس سمیت کل 73 کیڈٹس پر مشتمل پاک فضائیہ کے ایک چاق و چوبند دستے نے مزارِقائد پر گارڈ کے فرائض سنبھالے۔ یہ تقریب بانیِ پاکستان کی متحرک قیادت انکے نظم و ضبط اور پاک فضائیہ کی جانب سے انکے ادب و احترام کا منہ بولتا ثبوت ہے۔
اس پروقار تقریب نے پاک فضائیہ کو ناقابل تسخیر قوت بنانے کے عہد کی تجدید کی، جو عزم اور پیشہ ورانہ مہارت کے ساتھ ہر چیلنج کا مقابلہ کرنے کے لیے ہمہ وقت تیار ہے۔ ایئر وائس مارشل شہریار خان، ایئر آفیسر کمانڈنگ، پی اے ایف اکیڈمی اصغر خان نے اس موقع پر بطور مہمان خصوصی شرکت کی۔ اپنے خطاب میں انہوں نے اس امر کا اظہار کیا کہ سربراہ پاک فضائیہ ائیر چیف مارشل ظہیر احمد بابر سدھو، کی دور اندیش قیادت میں پاک فضائیہ "نیکسٹ جنریشن ائیر فورس” بن چکی ہے۔ انہوں نے اس امر پر بھی زور دیا کہ پاک فضائیہ نے اپنی جدت طرازی اور آپریشنل تیاریوں کے ذریعے زمانہ امن ہو یا جنگ، دنیا کو ہر دور میں اپنی اہلیت اور تیاری کا معترف کردیا ہے۔ آپریشن بنیان مرصوص کے دوران پاک فضائیہ کی فتوحات کا حوالہ دیتے ہوئے انہوں نے پاک فضائیہ کی جانب سے ہر قیمت پر ملکی فضائی سرحدوں کے تحفظ کے عزم کا اعادہ کیا۔
تقریب کے دوران مہمان خصوصی نے مزار قائد پر پھولوں کی چادر چڑھائی، فاتحہ خوانی کی اور قائداعظم کے ولولہ انگیز وژن اور قیادت کو زبردست خراج عقیدت پیش کیا۔
گارڈ کی تبدیلی کی یہ تقریب غیر معمولی اہمیت کی حامل ہے، جو قائداعظم کے نظریات کے تسلسل کی نشاندہی کرنے کے ساتھ ساتھ ایک محفوظ، مستحکم اور خوشحال پاکستان کے قیام کے قومی عزم کا منہ بولتا ثبوت ہے۔ مزید برآں یہ عمل ملک کی فضائی سرحدوں کے محافظ کے طور پر جرات، قربانی اور پیشہ ورانہ مہارت کی میراث کو آگے بڑھانے کے لیے پاک فضائیہ کے اہلکاروں کے عزم کی بھی عکاسی کرتا ہے۔
