عوام سیلاب ،لینڈ سلائیڈنگ صورتحال، موسمی رپورٹس ،اپ ڈیٹس سے باخبر رہیں ،سیلابی ریلے عبور کرنے سے گریز کریں، ترجمان
اسلام آباد (الفجرآن لائن) این ڈی ایم اے نے خیبرپختونخوا میں بارشوں سے لینڈ سلائیڈنگ کے خطرے کے پیش نظر الرٹ جاری کردیا۔ تفصیلات کے مطابق این ڈی ایم اے کے نیشنل ایمرجنسی آپریشن سنٹر نے خیبر پختونخوا میں مزید بارشوں سے لینڈ سلائیڈنگ کے خطرے کے پیش نظر الرٹ جاری کردیا ہے۔ جاری رپورٹ میں این ڈی ایم اے نے کہا ہے کہ خیبر پختونخوا کے متعدد اضلاع بشمول چارسدہ، چترال، لوئر اور اپر چترال، مانسہرہ، پشاور، شانگلہ اور سوات میں مزید بارشیں متوقع ہے جس سے ندی نالوں میں طغیانی ،شہروں میں سیلاب جبکہ پہاڑی علاقوں میں لینڈ سلائیڈنگ کا خطرہ ہے۔
حکام کے مطابق صوبائی اداروں کو ہنگامی صورتحال سے نمٹنے کی تیاری کیلئے الرٹ جاری کردیا گیا ہے جبکہ خطرے سے دوچار علاقوں میں ضروری آلات، مشینری اور ریسکیو عملے کی دستیابی یقینی بنانے کی ہدایت کی گئی ہے۔ این ڈی ایم اے نے عوام سے اپیل کی ہے کہ وہ سیلاب ،لینڈ سلائیڈنگ صورتحال، موسمی رپورٹس ،اپ ڈیٹس سے باخبر رہیں اور سیلابی ریلے عبور کرنے کرنے سے گریز کریںجبکہ سیاح و مسافر شدید بارشوں اور لینڈ سلائیڈنگ صورتحال میں غیر ضروری سفر سے گریز کریں۔
