ولنیئس(الفجرآن لائن)لتھوانیا میں ڈی ایچ ایل کا کار گو طیارہ لینڈنگ کے دوران ایئرپورٹ کے نزدیک ایک رہائشی عمارت سے ٹکرا کر تباہ ہوگیا۔غیر ملکی میڈیا کے مطابق حادثے کے بعد طیارے میں آگ لگ گئی،فائربریگیڈ کے عملے نے طیارے میں لگی آگ پر قابو پالیا۔جائے حادثہ سے دو افراد کو شدید زخمی حالت میں اسپتال منتقل کیا گیا جہاں ایک زخمی نے اسپتال میں دوران علاج زخموں کی تاب نہ لاتے ہوئے دم توڑ دیا جب کہ دوسرے زخمی کی حالت بھی نازک بتائی جا رہی ہے۔
ابھی یہ واضح نہیں کہ ہلاک اور زخمی ہونے والے طیارے کا عملہ تھے یا تباہ حال گھر کے بدقسمت رہائشی تھے۔ کارگو طیارہ جرمنی کے شہر لیپزگ سے لتھوانیا کے دارالحکومت ولنیئس آرہا تھا اسے ولنیئس ہوائی اڈے پر لینڈنگ کرنا تھی جہاں طیارے کومنفی درجہ حرارت کا سامنا تھا ۔تاحال طیارہ حادثے کی وجہ کا تعین نہیں ہوسکا۔ ابتدائی طور پر موسم کی خرابی ایک وجہ معلوم ہوتی ہے۔
