رمضان المبارک و عیدالفطر کے موقع پر عوام کو معیاری اور محفوظ خوراک کی فراہمی یقینی بنانے کے لیے بلوچستان فوڈ اتھارٹی کی انسپیکشن ٹیمیں صوبے بھر میں مسلسل متحرک ہیں۔
اس ضمن میں کوئٹہ کے مختلف علاقوں،کچلاک اور قلعہ سیف اللہ میں بڑی کارروائیاں کی گئیں، جہاں غیر معیاری، ناقص اور مضر صحت بیکری مصنوعات کی تیاری اور فروخت میں ملوث 15 بیکریوں، بیکنگ یونٹس اور سویٹس شاپس سمیت 30 سے زائد خوراک کے مراکز کے خلاف ایکشن لیا گیا۔ مذکورہ مراکز کے مالکان پر بھاری جرمانے عائد کیے گئے، جبکہ معمولی نقائص پرمتعدد مراکز کو وارننگ نوٹس جاری کیے گئے۔
دیگر جرمانہ کیے گئے مراکز میں جنرل اسٹورز، ڈیپارٹمنٹل اسٹورز، فوڈ پوائنٹس، ملک شاپس، گوشت کی دکانیں اور مصالحہ شاپس شامل تھیں، جہاں دورانِ انسپیکشن زائد المعیاد اشیاء، ملاوٹی خوراک اور صفائی کے ناقص انتظامات پائے گئے۔
انسپیکشن ٹیموں نے مختلف ڈیپارٹمنٹل اسٹورز سے زائد المعیاد اور غیر معیاری خوردنی اشیاء کی بڑی مقدار ضبط کر لی،
جنہیں بعد ازاں تلف کر دیا گیا۔ترجمان بی ایف اے کے مطابق بی ایف اے کی آپریشن ٹیمیں رمضان المبارک اور عید کے موقع پر خوراک کے مراکز کی چیکنگ کیلئے خصوصی طور پر متحرک ہیں تاکہ عوام کو معیاری اور محفوظ خوردنی اشیاء فراہم کی جا سکیں۔ اس سلسلے میں صوبے بھر میں روزانہ کی بنیاد پر مراکز و کارخانوں کا معائنہ کیا جا رہا ہے جبکہ کسی بھی قسم کی غفلت، ملاوٹ یا غیر معیاری اشیاء کی فروخت پر مالکان کے خلاف بھرپور ایکشن لیا جارہا ہے۔
ترجمان کے مطابق بلوچستان فوڈ اتھارٹی عوام سے بھی اپیل کرتی ہے کہ وہ غیر معیاری یا ملاوٹی خوراک کی فروخت کی صورت میں فوری طور پر اتھارٹی حکام کو اطلاع دیں تاکہ صحت عامہ سے کھلواڑ کرنے والے عناصر کے خلاف قانونی کارروائی عمل میں لائی جا سکے۔
