ماسکو (الفجرآن لائن) روسی فضائیہ کا سپرسونک بمبار طیارہ جنوب مشرقی سائبیریا کے علاقے ارکتسک میں گر کر تباہ ہو نے کے نتیجے میں ایک پائلٹ ہلاک جبکہ 3زخمی ہو گئے ہیں۔ روس کی وزارت دفاع کےمطابق ٹی یو ۔ 22M3 طویل فاصلے تک مار کرنے والے سپر سونک بمبار طیارے کو حادثہ گزشتہ روز مقامی وقت کے مطابق رات 10 بجے کےقریب پیش آیا جب معمول کی پرواز کے دوران اس کے ایک انجن میں تکنیکی خرابی کی وجہ سے آگ لگ گئی۔
رشیا ٹوڈے کی رپورٹ کے مطابق عملہ طیارے کو رہائشی علاقوں سے دور لے جانے میں کامیاب ہو گیا جس کی وجہ سے زمین پر کوئی شہری ہلاک یا زخمی نہیں ہوا اور نہ ہی کسی اور طرح کا کوئی نقصان نہیں ہوا۔ ابتدائی اطلاعات کے مطابق طیارے میں 4 پائلٹ موجود تھے جن میں سے تین زخمی اور ایک شدید زخمی تھا جو بعد میں ہسپتال میں دم توڑ گیا۔ رپورٹ کے مطابق طیارہ ایک ویران علاقے میں گرا اور اس کےگرنے کےبعد متعدد دھماکوں کی آوازیں سنائی دیں۔ ابتدائی تحقیقات کے مطابق حادثہ تکنیکی خرابی کی وجہ سے پیش آیا کیونکہ مبینہ طور پر طیارہ ٹیک آف کے چند منٹ بعد حادثے کا شکار ہو گیا ۔ ٹی یو ۔ 22M3 طویل فاصلے مارکرنے والے بمبار طیارہ ہے جو جوہری وارہیڈ لے جانے کی صلاحیت رکھتا ہے۔ اسے 1970 کی دہائی میں روسی فضائیہ میں شامل کیا گیا تھا۔
