انتظامیہ نے کالج و ہوسٹلز دو ہفتے کیلئے بند کردیئے، اعلامیہ جاری
کوئٹہ (الفجر آن لائن) بولان میڈیکل کالج میں طلبہ کے 2گروپوں میں تصادم کے نتیجے میں 6 طلباء زخمی ہوگئے۔ پولیس کے مطابق کوئٹہ کے بروری روڈ پر واقع بولان میڈیکل کالج میں طلباء کے 2گروپوں کے درمیان تصادم کے نتیجے میں ڈنڈوں اور لاٹھیوں کا آزادانہ استعمال کیاگیا جس سے 6 طلباء زخمی ہوگئے جنہیں ہسپتال منتقل کردیا گیا۔پولیس کے مطابق تصادم کی اطلاع ملنے پر موقع پر پہنچ کر مشتعل طلباء کو منتشر کرنے کیلئے آنسو گیس کی شیلنگ کی گئی اور متعدد طلباء کو گرفتار کرکے بروری تھانے منتقل کیا گیا۔دوسری جانب بولان میڈیکل کالج کی جانب سے جاری اعلامئے میں کہا گیا ہے کہ کالج کی موجودہ صورتحال کے پیش نظر میڈیکل کالج میں تعلیمی سرگرمیاں 2ہفتوں کیلئے معطل کردی گئی ہیں جبکہ کالج کے تمام ہوسٹلز بھی دو ہفتوں کیلئے بند کردیئے گئے ہیں۔
