تم لوگ کھڑے ریوڑیاں کھا رہے ہو،یہ اندر جاکر پریس کانفرنس کر کے آ گیا،ایس ایچ او کااہلکاروں پر اظہار برہمی
اسلام آ باد(الفجر آن لائن)پی ٹی آئی کے احتجاج کو روکنے کیلئے کیے گئے تمام تر انتظامات کے باوجود جماعت اسلامی کے مرکزی رہنما میاں اسلم ڈی چوک اسلام آباد پہنچ گئے جس کی ویڈیو سوشل میڈیا پر وائر ہو گی جس میں دیکھا جا سکتا ہے کہ میاں اسلم کو ڈی چوک میں پولیس اہلکاروں اور صحافیوں سے خوش گپیاں کررہے ہیں جبکہ ایک پولیس افسر کو انہیں ڈی چوک سے جانے کا کہتے بھی سنا جا سکتا ہے۔ویڈیو میں دیکھا جا سکتا ہے کہ میاں اسلم کے ڈی چوک سے باہر نکلتے ہی اسلام آباد پولیس کے ایس ایچ او وہاں تعینات پولیس اہلکاروں پر برہمی کا اظہار کر رہے ہیں ۔
ایس ایچ او نے پولیس اہلکاروںکو کہاہ کہ تم لوگ یہاں کھڑے ریوڑیاں کھا رہے ہو اور یہ اندر جاکر پریس کانفرنس کر کے آ گیا، جس پر رہنما جماعت اسلامی نے کہا کہ یہ غلط کہہ رہے ہیں میں نے کوئی پریس کانفرنس نہیں کی۔واضح رہے پاکستان تحریک انصاف کے احتجاج کے پیش نظر جڑواں شہروں راولپنڈی اور اسلام آباد میں سکیورٹی کے انتہائی سخت انتظامات کیے گئے ہیں اور کسی بھی شخص کو ریڈ زون میں داخلے کی اجازت نہیں ہے۔ حکومت نے پی ٹی آئی کے احتجاج کو روکنے کے لیے اسلام آباد میں 6 ہزار سکیورٹی اہلکار تعینات کیے ہیں اور جگہ جگہ کنٹینر اور خار دار تاریں لگا کر راستے بند کیے گئے ہیں تاکہ کوئی بھی ریڈ زون میں داخل نہ ہو سکے۔
