9 مئی کو دھول اڑانے والے آج دھول بٹھانے کی باتیں کر رہے ہیں،عطاء تارڑ

اسلام آباد(الفجر آن لائن)وفاقی وزیر اطلاعات ونشریات عطاء اللہ تارڑ نے کہا ہے کہ 9 مئی کو دھول اڑانے والے آج دھول بٹھانے کی باتیں کر رہے ہیں،، تحریک انصاف کی پوری قیادت سانحہ 9 مئی میں ملوث ہے۔ تحریک انتشار گولی چلنے کا جھوٹا بیانیہ بنا رہی ہے،گولی چلی ہے تو ثبوت سامنے کیوں نہیں لاتے؟موقع سے بھاگنے والے بہانے بنا رہے ہیں۔چیئرمین پی ٹی آئی بیرسٹر گوہر کے بیان پر ردعمل میں وفاقی وزیر اطلاعات عطاء اللہ تارڑ نے کہا کہ 9 مئی کو دھول اڑانے والے آج دھول بٹھانے کی باتیں کر رہے ہیں، تحریک انتشار گولی چلنے کا جھوٹا بیانیہ بنا رہی ہے، گولی چلی ہے تو ثبوت سامنے کیوں نہیں لاتے؟ دوڑ کیوں لگائی؟،موقع سے بھاگنے والے بہانے بنا رہے ہیں۔

وفاقی وزیر اطلاعات نے کہا کہ غلیلوں، بنٹوں، پتھروں، سٹن گنز اور آتشیں اسلحہ سے لیس شرپسندوں نے 26 نومبر کو وفاق پر چڑھائی کی، پولیس اور رینجرز کے جوانوں کو شہید اور زخمی کیا، اس نقصان کا مداوا کون کرے گا؟ انہوں نے کہا کہ شہید جوانوں کا خون کس کے ہاتھوں پر تلاش کریں، تحریک انصاف کے پاس گولی چلنے کا کوئی ایک ثبوت ہے تو سامنے لائے، پرتشدد سیاست اور پرتشدد احتجاج پی ٹی آئی کا وطیرہ ہے۔ وزیر اطلاعات نے کہا کہ اپنے اوپر اٹھنے والے سوالات کا جواب دیں، الزامات لگا کر ان سے منہ مت پھیریں، سانحہ 9 مئی کے تمام ثبوت موجود ہیں، تحریک انصاف کی پوری قیادت سانحہ 9 مئی میں ملوث ہے۔