الف انار،ب بکری والی تعلیم سے معاشرہ ترقی نہیں کر سکتا،میر سرفرازبگٹی

بلوچستان میں بیڈگورننس کے ذمہ دار سیاستدان ،بیوروکریٹس ہیں،ایوان کے اعتماد تک وزیراعلی رہوں گا ،بلیک میل نہیں ہوں گا، سیمینار سے خطاب

کوئٹہ(الفجرآن لائن) وزیراعلی بلوچستان میر سرفرازبگٹی نے کہا ہے کہ الف انار ،ب بکری والی تعلیم سے معاشرہ ترقی نہیں کر سکتا،بلوچستان میں بیڈگورننس کے ذمہ دار سیاستدان ،بیوروکریٹس ہیں،ایوان کے اعتماد تک وزیراعلی رہوں گا ،بلیک میل نہیں ہوں گا۔تفصیلا ت کے مطابق سول سیکرٹریٹ میں سیمینار سے خطاب کرتے ہوئے وزیراعلی بلوچستان میر سرفراز بگٹی نے کہا کہ بلوچستان میں بیڈ گورننس کے ذمہ دار سیاستدان اور دوسرا بیوروکریٹس دونوں ہیں، حکومت سنبھالنے کے بعد صوبے میں گورننس کا فقدان نظر آیا، 200ارب کے ساتھ صوبے کو ترقی نہیں دی جاسکتی، سوال یہ ہے کہ یہ 200ارب روپے کہاں جاتے ہیں؟، صوبے کا غیر ترقیاتی بجٹ جس تیزی سے اوپر جارہا ہے،کچھ عرصہ بعد ہمارے پاس تنخواہوں کے پیسے نہیں ہوں گے۔انہوں نے کہا کہ بلوچستان میں ہمیشہ مخلوط حکومت ہوتی ہے جس میں وزیراعلی بلیک میل ہوتا ہے لیکن مجھے جب تک ایوان کا اعتماد حاصل رہے گا وزیراعلی رہوں گا لیکن بلیک میل نہیں ہوں گا۔انہوں نے کہا کہ بلوچستان میں بیوروکریسی کایہ نظام چلنے والا نہیں ہے، ہم نے صوبے کیلئے ایک ریفارم کمیٹی بنائی ہے، صوبے کو امن و امان، گورننس اور ماحولیاتی تبدیلیوں کے چیلنجز کا سامنا ہے، کم وسائل میں بہتر ڈیلیور کرنا ہی کامیاب سٹوری ہے۔انہوں نے کہا کہ الف انار ،ب بکری والی تعلیم سے معاشرہ ترقی نہیں کر سکتا، صحت کیلئے 80ارب روپے سالانہ دیتے ہیں، ان پیسوں سے بلوچستان کے ہر فرد کا علاج مہنگی ترین نجی ہسپتال سے ہوسکتا ہے، ہم صوبے میں مکالمہ شروع کررہے ہیں، کلچر اور سپورٹس کو آگے بڑھانے کی کوشش کریں گے۔