جماعت اسلامی کا آئی پی پیز کیساتھ کیپسٹی پیمنٹ، ڈالر میں ادائیگی کا معاہدہ ، پٹرولیم ڈویلپمنٹ لیوی ختم کرنے کا مطالبہ
اسلام آباد (الفجرآن لائن) جماعت اسلامی نے حکومت سے آئی پی پیز کیساتھ کیپسٹی پیمنٹ، ڈالر میں ادائیگی کا معاہدہ اور پٹرولیم ڈویلپمنٹ لیوی ختم کرنے کا مطالبہ کردیا۔ تفصیلات کے مطابق وفاقی وزیر داخلہ محسن نقوی نے نائب امیر جماعت اسلامی لیاقت بلوچ سے ٹیلیفونک رابطہ کیا اور دھرنے کے خاتمے اور مطالبات کے حوالے سے معاملات پر تبادلہ خیال کیا۔ وزیر داخلہ نے کہا کہ حکومت پوری سنجیدگی کے ساتھ جماعت اسلامی سے مذاکرات چاہتی ہے جبکہ لیاقت بلوچ نے اپنے مطالبات بتاتے ہوئے کہا کہ 500یونٹ استعمال کرنیوالے صارفین کو بجلی بلوںمیں 50 فیصد رعایت دی جائے، بجلی بلز میں سلیب ریٹ ختم کئے جائیں۔انہوں نے کہا کہ آئی پی پیز کے ساتھ کیپیسٹی پیمنٹ اور ڈالر میں ادائیگی کا معاہدہ ختم ،غریب تنخواہ دار طبقے پر ٹیکسوں کا ظالمانہ بوجھ واپس لیا جائے۔انہوں نے مطالبہ کیا کہ پیٹرولیم مصنوعات کی قیمتوں میں حالیہ اضافہ واپس لیا جائے اور پیٹرولیم ڈویلپمنٹ لیوی ختم کی جائے۔
