شمالی وزیرستان کے علاقے سپن وام میں سکیورٹی فورسز کی جانب سے 4 اور 5 اکتوبر کی درمیانی شب خوارج کے خلاف کارروائی کی،6خوارجیوں کو جہنم کوواصل کردیا گیا
راولپنڈی (الفجرآن لائن)شمالی وزیرستان کے علاقے سپن وام میں سیکورٹی فورسز اور خوارج کے درمیان جھڑپ میں 6خوارجیوں کو جہنم کوواصل کردیا گیا جبکہ لیفٹیننٹ کرنل سمیت 6 جوان جام شہادت نوش کرگئے۔پاک فوج کے شعبہ تعلقات عامہ(آئی ایس پی آر) کے مطابق شمالی وزیرستان کے علاقے سپن وام میں سکیورٹی فورسز کی جانب سے 4 اور 5 اکتوبر کی درمیانی شب خوارج کے خلاف کارروائی کی گئی، لیفٹیننٹ کرنل محمد علی شوکت آپریشن کی قیادت کر رہے تھے اس دوران سیکورٹی فورسز اور خوارج کے درمیان فائرنگ کا تبادلہ ہوا جس کے نتیجے میں فتنۃ الخوارج کے 6دہشت گرد ہلا ک ہوگئے ۔ خوارج سے شدید فائرنگ کے تبادلے میں لیفٹیننٹ کرنل محمد علی شوکت سمیت 6 جوان بھی شہید ہو گئے۔ شہید ہونے والے دیگر 5 جوانوں میں لانس نائیک محمد اللہ، لانس نائیک اختر زمان، لانس نائیک شاہد اللہ، لانس نائیک یوسف علی اور سپاہی جمیل احمد شامل ہیں۔ 43 سالہ شہید لیفٹیننٹ کرنل کا تعلق فیصل آباد سے تھا جبکہ دیگر پانچ جوانوں کا تعلق خیبر، لکی مروت، ٹانک، اورکزئی اور سوات سے تھا۔43 سالہ لیفٹیننٹ کرنل محمد علی شوکت شہید کا تعلق فیصل آباد سے ہے۔ لیفٹیننٹ کرنل محمد علی شوکت شہید نے سوگواران میں اہلیہ اور تین بیٹے چھوڑے ہیں۔30 سالہ لانس نائیک محمد اللہ شہید کا تعلق ضلع خیبر سے ہے۔ لانس نائیک محمد اللہ شہید نے پاک فوج میں 13 سال تک دفاع وطن کا فریضہ سرانجام دیا۔ لانس نائیک محمد اللہ شہید نے اہلیہ غمگسار میں چھوڑی۔ 30 سالہ لانس نائیک اختر زمان شہید کا تعلق ضلع لکی مروت سے ہے۔ لانس نائیک اختر زمان شہید نے 10 سال تک دفاع وطن کا فریضہ سر انجام دیا۔ انہوں نے اہلیہ سوگوار میں چھوڑی۔29 سالہ لانس نائیک شاہد اللہ شہید کا تعلق ضلع ٹانک سے ہے۔ لانس نائیک شاہد اللہ شہید نے 7 سال پاک فوج میں خدمات سرانجام دیں۔ انہوں نے سوگواران میں اہلیہ چھوڑی۔31 سالہ لانس نائیک یوسف علی شہید کا تعلق لوئر اورکزئی سے ہے۔ لانس نائیک یوسف علی شہید نے 11 سال تک پاک فوج میں رہتے ہوئے دفاع وطن کا فریضہ سرانجام دیا۔ انہوں نے بھی غمگساروں میں اہلیہ چھوڑی۔26 سالہ سپاہی جمیل احمد شہید کا تعلق ضلع سوات سے ہے۔ سپاہی جمیل احمد شہید نے پانچ سال تک پاک فوج میں خدمات سرانجام دیں۔ سپاہی جمیل احمد شہید نے اہلیہ سوگوار میں چھوڑی۔ آئی ایس پی آر کا کہنا ہے کہ علاقہ میں ممکنہ طور پر موجود مزیدکسی خارجی کے خاتمے کے لیے آپریشن کلئیرنس جاری ہے۔ سکیورٹی فورسز دہشتگردی کی لعنت کو ختم کرنے کے لیے پرعزم ہیں، ہمارے بہادر سپاہیوں کی قربانیاں ہمارے عزم کو مزید تقویت دیتی ہیں
