749 ملزمان 14 روزہ جوڈیشل ریمانڈ پر اڈیالہ منتقل،خاتون سمیت 37کارکنان ڈسچارج
راولپنڈی (الفجر آن لائن) اے ٹی سی نے5971 میں سے 4185گرفتار پی ٹی آئی کارکنان کا 5 سے 7 روزہ جسمانی ریمانڈ منظورکرلیا۔ جمعہ کو اے ٹی سی کی خصوصی عدالت میں جج امجد علی شاہ نے گرفتار پی ٹی آئی کارکنان کیخلاف درج مقدمات پر سماعت کی۔ تمام تھانوں سے مجموعی طور پر 5971کارکنان کو عدالت کے روبرو پیش کیا گیا جبکہ پی ٹی آئی کے وکلاء کی ٹیم بھی گرفتار شدگان کی طرف سے عدالت کے سامنے پیش ہوئی۔
عدالت نے 4185گرفتار کارکنوں کا 5سے 7روزہ جسمانی ریمانڈ منظور کرلیا۔ عدالت نے 749گرفتار ملزمان 14 روزہ جوڈیشل ریمانڈ پر اڈیالہ جیل بھیج دیئے جبکہ ایک خاتون مسما ۃزلیخا بی بی سمیت 37کارکنوں کو ڈسچارج کر کے رہا کر دیا گیا۔عدالت نے جوڈیشل ریمانڈ پر بھیجے گئے ملزمان کو12دسمبر جبکہ جسمانی ریمانڈ پر بھیجے گئے ملزمان کو 5دسمبر پیش کرنے کا حکم دیا۔واضح رہے کہ راولپنڈی ڈویژن کے16تھانوں میں مجموعی 24نومبر احتجاج کے 23مقدمات درج کئے گئے جس میں سب سے زیادہ مقدمات ڈسٹرکٹ اٹک کے تھانوں باہتر، حضرو، حسن ابدال، فتح جنگ اور رنگو میں درج ہوئے ہیں۔
