اسلام آباد(الفجر آن لائن)وفاقی وزیر اطلاعات عطاء اللہ تارڑ نے علی امین گنڈاپور کے بیان پر ردعمل دیتے ہوئے کہاکہ غیر قانونی مقیم افغان شہریوں کے ساتھ مسلح جتھوں سے لیس ہو کر احتجاج کرنا پی ٹی آئی کا وطیرہ ہے، انہوں نے ہمیشہ ریاست اور عوام کا نقصان چاہا ہے، تحریک انتشار نے پچھلی مرتبہ بھی جدید اسلحے، سٹن گنز، ٹیئر گیس شیل اور گرینیڈ سے لیس مسلح جتھوں کے ساتھ وفاق پر لشکر کشی کی،تحریک انتشار کے مسلح جتھوں نے بلا اشتعال فائرنگ کی، علی امین گنڈاپور کے گارڈز کو گولی چلاتے ہوئے دیکھا گیا، یہ لاشیں گرا کر ان پر سیاست کرنا چاہتے ہیں۔
ان کا کوئی احتجاج کبھی پرامن نہیں ہوا، وفاقی وزیر اطلاعات نے کہاکہ یہ ملک میں بدامنی چاہتے ہیں، انہوں نے ہمیشہ سیاسی مفاد پر ریاست کے مفاد کو قربان کیا ہے،9 مئی اور 26 نومبر ملکی تاریخ کے سیاہ ترین دن ہیں، ملتان میں بانی چیئرمین پی ٹی آئی کے جلسہ کے دوران بھگدڑ مچنے سے کئی ہلاکتیں ہوئیں لیکن بانی چیئرمین پی ٹی آئی نے اپنی تقریر جاری رکھی، انہیں کبھی عوام کے جان و مال کی کوئی پرواہ نہیں رہی، خیبر پختونخوا کے عوام پہلے ہی ان کی کال کو مسترد کر چکے ہیں،عوام تحریک انتشار کی اگلی کال بھی مسترد کریں گے۔
