41 ارکان کو پارٹی تبدیلی کیلئے 15دن دینا آئین کو دوبارہ تحریر کرنے کے مترادف ،قانون سے ہٹ کر نیا طریقہ نہیں اپنایا جا سکتا، موقف
اسلام آباد (الفجرآن لائن) مسلم لیگ (ن)کی 3 خواتین ارکان نے مخصوص نشستوں بارے فیصلے کیخلاف سپریم کورٹ میں نظرثانی اپیل دائر کردی۔تفصیلات کے مطابق مسلم لیگ (ن) کی 3 خواتین ارکان ہما اختر چغتائی، ماہ جبین عباسی اور سیدہ آمنہ بتوں نے مخصوص نشستوں بارے فیصلے کیخلاف سپریم کورٹ میں نظرثانی اپیل دائر کردی۔نظرثانی اپیل میں سنی اتحاد کونسل ،الیکشن کمیشن سمیت دیگر کو فریق بناتے ہوئے موقف اپنایا گیا ہے کہ سنی اتحاد کونسل کا مخصوص نشستوں کیلئے فہرست جمع نہ کرانا تسلیم شدہ حقیقت ہے، پورا کیس سنی اتحاد کونسل کی مخصوص نشستوں سے متعلق تھا،اپنی مرضی سے سنی اتحاد کونسل میں جانے والے 41ارکان کو پارٹی تبدیل کرنے کیلئے 15 دن دینا آئین کو دوبارہ تحریر کرنے کے مترادف ہے۔درخواست میں کہا گیا ہے کہ قانون میں طے کردہ اصول سے ہٹ کر نیا طریقہ نہیں اپنایا جا سکتا ہے، اکثریتی فیصلہ آئین کے تحت نہیں ہے، عدالت سے استدعا ہے کہ 12جولائی کے مختصر اکثریتی فیصلے کو کالعدم قرار دیا جائے۔
