امن و معیشت پر سیاست نہیں کرنی چاہئے،پٹاخا بھی نہ دیکھنے والے دہشت گردی پر کیسے بات کرسکتے ہیں؟،میڈیا سے گفتگو
اسلام آباد(الفجرآن لائن) وفاقی وزیر سیفران انجینئر امیر مقام نے وزیراعظم سے بنوں واقعے پر جے آئی ٹی تشکیل دینے کا مطالبہ کرتے ہوئے کہا ہے کہ امن و معیشت کے معاملے پر سیاست نہیں کرنی چاہئے،پٹاخا بھی نہ دیکھنے والے دہشت گردی پر کیسے بات کرسکتے ہیں؟۔تفصیلات کے مطابق اسلام آباد میں پریس کانفرنس وفاقی وزیر سیفران انجینئر امیر مقام نے جرمنی میں پاکستانی پرچم کی بے حرمتی کے واقعے کی شدید مذمت کرتے ہوئے کہا کہ ہم نے 40 سال افغانیوں کی میزبانی کی ، جرمنی میں جو کچھ ہوا وہ قابل مذمت و اشتعال انگیز ہے، معاملہ اعلی سطح پر اٹھایا جائے گا۔ انہوں نے کہا کہ امن و معیشت کے معاملے پر سیاست نہیں کرنی چاہئے،وزیراعلی خیبرپختونخوا بڑی بڑی باتیں کررہے ہیںکہ بنوں واقعے کی انکوائری کرائینگے، وہ کیا انکوائری کرائینگے، جن لوگوں نے پٹاخا بھی نہیں دیکھا وہ دہشت گردی پر کیسے بات کرسکتے ہیں؟۔انہوں نے کہا کہ وزیراعظم سے مطالبہ ہے کہ بنوں واقعے کی تحقیقات کیلئے جے آئی ٹی تشکیل دی جائے۔ انہوں نے کہا کہ کچھ شرپسند عناصر نے خاکی وردی کو بدنام کیا، یہ خاکی وردی سرحدوں کی حفاظت کر رہی ہے ،مشکل میں ہوتے آپ اسی خاکی وردی کو بلاتے ہیں ، وزیر اعظم اورآرمی چیف ملکی معاشی استحکام کیلئے کام کر رہے ہیں جبکہ پی ٹی آئی ملک کیخلاف سازش کررہی ہے۔
