آئی پی پیز سے معاہدے گھناؤنا فعل سرکاری افسران کیلئے مفت بجلی، گیس ،پٹرول کلچر ختم کیا جائے،آئی پی پیز مالکان سے لوٹی رقم لیکر قومی خزانے میں جمع کرائی جائے، اختر اقبال ڈار کی پریس کانفرنس
اسلام آباد/ شیخوپورہ(الفجرآن لائن) پی ٹی آئی نظریاتی نے آئی پی پیز سے معاہدوں کی منسوخی کیلئے سپریم کورٹ میں درخواست دائر کردی ۔تفصیلات کے مطابق چیئرمین پی ٹی آئی (نظریاتی ) اختر اقبال ڈار نے پریس کانفرنس کرتے ہوئے کہا کہ آئی پی پیز سے بجلی مہنگے داموں خریدنے کیخلاف سپریم کورٹ میں درخواست دائر کردی ہے، امیرجماعت اسلامی حافظ نعیم الرحمان، مصطفی کمال، گوہر اعجاز رٹ پٹیشن میں ہمارا ساتھ دیں، آئی پی پیز سے معاہدے گھناؤنا وگندا فعل ہیں جو پاکستان کو دیمک کی طرح چاٹ رہے ہیں۔انہوں نے کہا کہ چیف جسٹس سے استدعا ہے کہ رٹ پٹیشن کو انسانی بنیادی حقوق ،مفاد عامہ اور پاکستان کے مقدمے کے طور پر فوری سماعت کیلئے مقرر کریں ۔ انہوں نے کہا کہ ہماری استدعا ہے کہ آئی پی پیز کو ہونے والی کیپسٹی پیمنٹ پر بھی حکم امتناعی جاری کیا جائے۔انہوں نے کہا کہ آئی پی پیز کو گارنٹی دینے، گارنٹی لینے والے پاور پلانٹ لگانے والے حکمران ہیں۔ انہوں نے مطالبہ کیا کہ سرکاری افسران کیلئے مفت بجلی، گیس اور پٹرول کے کلچر کو فوری ختم کیا جائے۔ انہوں نے کہا کہ آئی پی پیز کے تمام مالکان کو انصاف کے کٹہرے میں کھڑا کر کے لوٹی ہوئی رقم واپس قومی خزانے میں جمع کرائی جائے۔
