ہلاک ہونیوالوں میں اکبر بگٹی کا پوتا بھی شامل، تصادم سے بچنے کیلئے جناح ہسپتال کی ایمرجنسی کے باہر پولیس ، رینجرز کی بھاری نفری تعینات، وزیر داخلہ سندھ نے رپورٹ طلب کرلی
کوئی قانون سے بالا تر نہیں ، قانون کی رٹ کے قیام کیلئے ہر ممکن اقدامات کئے جائیں گے،ضیا الحسن لنجار
کراچی (الفجرآن لائن)ڈیفنس خیابان نشاط پر دو گروپوں میں مسلح تصادم میں 5افراد جاں بحق،2 زخمی ہوگئے۔تفصیلات کے مطابق کراچی کے علاقے ڈیفنس خیابان نشاط میں دو گروپوں میں مسلح تصادم کے نتیجے میں اکبر بگٹی کے پوتے سمیت 5 افراد جاں بحق اور 2 زخمی ہوگئے، واقعے کی اطلاع ملتے ہی پولیس اور ریسکیو حکام موقع پر پہنچ گئے اور ہلاک و زخمیوں کو ہسپتال منتقل کردیا۔ حکام کے مطابق جاں بحق افراد کی شناخت میر محسم بگٹی، میر عیسیٰ بگٹی، علی بگٹی، فہد بگٹی اور نصیب اللہ کے ناموں سے ہوئی ہے جبکہ زخمیوں میں میر علی حیدر بگٹی اور قائم علی شامل ہیں۔
ایس ایس پی ساؤتھ کے مطابق مسلح تصادم فہد بگٹی گروپ اور علی حیدر بگٹی گروپ کے افراد کے درمیان ہوا جس کے نتیجے میں ایک گروپ کے 3اور دوسرے گروپ کے 2 افراد جاں بحق ہوئے ۔ انہوں نے بتایا کہ فریقین کا تعلق نوابزادہ اکبر بگٹی کے خاندان سے ہے۔واقعے کے بعددونوں گروپس کے افراد کی بڑی تعداد جناح ہسپتال کی ایمرجنسی کے باہر پہنچنے پر پولیس و رینجرز کی بھاری نفری تعینات کردی گئی ہے ۔
ہسپتال انتظامیہ کے مطابق کہ ہسپتال میں پانچ لاشیں لائی گئی ہیں جبکہ دو زخمیوں کو پرائیویٹ ہسپتال میں منتقل کر دیا گیا ہے۔دوسری جانب وزیر داخلہ سندھ ضیا الحسن لنجار نے ایڈیشنل آئی جی کراچی سے واقعے کی تفصیلات طلب کرتے ہوئے کہا ہے کہ کوئی بھی قانون سے بالا تر نہیں ہے، قانون کی رٹ کے قیام کیلئے ہر ممکن اقدامات کئے جائیں گے ۔ انہوں نے کہا کہ مسلح تصادم میں ملوث عناصر کے خلاف قانونی کاروائی کو یقینی بنایا جائے، کسی کو بھی شہر میں قیام امن جیسے اقدامات کو نقصان پہنچانے کی اجازت نہیں ہے۔
