کسی کو افغانستان سے دوسرے ملک میں جنگ کی اجازت نہیں دی، پاکستان معلومات شیئر کرے، ذبیح اللہ مجاہد
کابل (الفجرآن لائن) ترجمان افغان حکومت ذبیح اللہ مجاہد نے پاکستان اور ٹی ٹی پی کے درمیان ثالثی کے کردار کی پیشکش کرتے ہوئے کہا ہے کہ کسی کو بھی افغانستان سے دوسرے ملک میں جنگ کی اجازت نہیں دی، پاکستان کے پاس معلومات ہیں تو شیئر کرے۔غیر ملکی میڈیا کو انٹرویو میں ترجمان افغان حکومت ذبیح اللہ مجاہد نے کہا ہے کہ پاکستان کے ساتھ اچھے تعلقات کے خواہاں ہیں، چاہتے ہیں کہ پاکستان کے ساتھ بھائی چارے کے تعلقات رکھیں۔
انہوں نے کہا کہ ایک دوسرے سے بہتر تعلقات دونوں ممالک کی ضرورت ہیں۔ انہوں نے کہا کہ ہم کسی کو بھی افغانستان سے کسی دوسرے ملک میں جنگ کی اجازت نہیں دیتے، اگر پاکستان کے پاس اس حوالے سے کوئی معلومات ہے تو شیئر کرے۔انہوں نے کہا کہ پاکستان چاہے تو ہم پاکستان اورٹی ٹی پی کے درمیان ثالثی کا کردار ادا کر سکتے ہیں، اگر پاکستان نہیں چاہتا تو پھر یہ ان کا کام ہے کیونکہ یہ ان کا اندرونی مسئلہ ہے۔
