اللہ تعالی کا شکر شر انگیزی کی سازش ناکام،پرامن پاکستان کی جیت ہوئی ہے، وزیر داخلہ
اسلام آباد (الفجر آن لائن)وفاقی وزیر داخلہ محسن نقوی نے تمام سیکیورٹی اداروں کو مظاہرین کو پسپا کرنے پر مبارکباد دیتے ہوئے کہاہے کہ اللہ تعالی کا شکر ہے شر انگیزی کی سازش ناکام،پرامن پاکستان کی جیت ہوئی ہے۔بدھ کی صبح وفاقی وزیر داخلہ محسن نقوی نے ڈی چوک سے خیبر پلازہ تک دورہ کیا اور ڈی چوک پر موجود قانون نافذ کرنے والے اداروں کے جوانوں سے ملے۔وزیر داخلہ نے جوانوں کی جوانمردی کی تعریف کرتے ہوئے ڈی چوک اور دیگر علاقے کلیئر کرانے پر قانون نافذ کرنے والے اداروں کو خراج تحسین پیش کیا۔انہوں نے شر پسندوں سے کلیئر کرائے گئے علاقوں کا جائزہ لیا اور سڑکوں کی فوری صفائی کا حکم دیتے ہوئے عمارتوں اور دیگر تنصیبات کو پہنچنے والے نقصانات کا بھی جائزہ لیا۔انہوں نے سڑکوں سے رکاوٹیں ہٹانے کی ہدایت کرتے ہوئے کہا ہے کہ رینجرز کے افسروں اور جوانوں نے بہادری کے ساتھ مظاہرین کو پسپا کیا۔انہوں نے کہاکہ پاک فوج، ایف سی، اسلام آباد، پنجاب اور سندھ پولیس کو جرات مندانہ کردار پر مبارک باد دیتا ہوں، پرامن پاکستان اور پاکستانیوں کی جیت ہوئی ہے۔انہوں نے کہا کہ اللہ تعالی کا شکر بجا لاتے ہیں کہ شر انگیزی کی سازش بری طرح ناکام ہوئی اور پرامن پاکستان اور پاکستانیوں کی جیت ہوئی ہے۔
