گریڈ ایک سے 16کے ملازمین کیلئے میڈیکل اور کنوینس الاؤنس میں 200فیصد اضافے کا مطالبہ
اسلام آباد (الفجرآن لائن) وفاقی بجٹ میں تنخواہوں میں 15سے 20فیصد اضافے کی تجویز پیش کردی گئی۔ اطلاعات کے مطابق وفاقی بجٹ میں وزارت خزانہ کو تنخواہوں میں 15سے 20فیصد اضافے کی تجویز پیش کی گئی ہے۔ ذرائع وزارت خزانہ کے مطابق بیوروکریسی کی موناٹائزیشن پالیسی میں 40ہزار سے 60ہزار روپے جبکہ گریڈ 20تک کے افسران کیلئے موناٹائزیشن 65ہزار روپے سے بڑھا کر 1 لاکھ 5 ہزار روپے کرنے کی تجویز دی گئی ہے۔گریڈ 21کے افسران کیلئے 75ہزار روپے موناٹائزیشن پالیسی کو بڑھا کر 1لاکھ 20ہزار روپے جبکہ گریڈ 22کے افسر کو ملنے والی موناٹائزیشن 95ہزار روپے سے بڑھا کر 1لاکھ 55ہزار روپے کرنے کی تجویز زیر غور ہے۔
ذرائع کے مطابق گریڈ ایک سے 22گریڈ کے ملازمین کی تنخواہوں میں 10فیصد اضافے سے تقریبا 80ارب روپے کا اثر آئے گا۔ذرائع کے مطابق گریڈ ایک سے 16کے ملازمین کیلئے میڈیکل اور کنوینس الاؤنس میں 200فیصد اضافے کا مطالبہ کیا گیا ہے۔گریڈ ایک سے گریڈ 16سکیل کے ملازمین کو اس وقت 1800روپے کنوینس الاؤنس اور 1500روپے میڈیکل الاؤنس مل رہا ہے جبکہ 17اور 18 گریڈ کے افسران کو اس وقت 5000روپے کنوینس الاؤنس مل رہا ہے، گریڈ 17سے 18کیلئے بھی کنوینس الاؤنس میں 200فیصد اضافے کی ابتدائی تجویز دی گئی ہے۔ذرائع کے مطابق گریڈ ایک سے 16کے ملازمین کو 2021ء اور 2022ء میں 25اور 15فیصد ڈسپیر یٹی الاؤنس ملا تھا، صوبوں اور وفاق کے ملازمین کی تنخواہوں میں فرق کم کرنے کیلئے ڈسپیریٹی الاؤنس جاری رکھنے کی تجویز دی گئی ہے۔ذرائع کے مطابق تنخواہوں اور الاؤنسز میں اضافے کی تجاویز ابتدائی مراحل میں ہیں، حتمی فیصلہ وزیراعظم وزارت خزانہ اور کابینہ کی مشاورت سے کریں گے۔
