گبد بارڈر کراسنگ اور گوادر شہر میں حملوں کی کوششیں ناکام، کلیئرنس آپریشنز مکمل؛ سیکیورٹی فورسز کا کوئی جانی نقصان نہیں ہوا
راولپنڈی (الفجر آن لائن): بلوچستان کے علاقے گوادر میں گبد بارڈر کراسنگ اور گوادر شہر میں دہشت گردی کی کوششیں ناکام بنا دی گئیں۔ پاک فوج کے شعبۂ تعلقاتِ عامہ (آئی ایس پی آر) کے مطابق مختلف جھڑپوں کے دوران ایک خاتون دہشت گرد سمیت 10 دہشت گرد ہلاک کر دیے گئے، جبکہ حملوں کے دوران ایک شہری شہید اور متعدد گاڑیوں کو نقصان پہنچا۔
آئی ایس پی آر کے مطابق بھارتی سرپرستی میں سرگرم تنظیم فتنہ الہندوستان سے تعلق رکھنے والے دہشت گردوں نے گبد بارڈر کراسنگ اور گوادر شہر میں دہشت گردانہ کارروائیوں کی کوشش کی۔ دہشت گردوں نے ایسے مقامات کو نشانہ بنانے کی کوشش کی جہاں ان کی کارروائیوں سے انہی شہریوں کو نقصان پہنچنے کا خدشہ تھا جن کی نمائندگی کا وہ دعویٰ کرتے ہیں۔ بیان کے مطابق ان کارروائیوں کا مقصد بلوچستان میں ترقی اور خوشحالی کی کوششوں کو نقصان پہنچانا تھا۔
ترجمان پاک فوج کے مطابق مقامی آبادی کے تحفظ اور متاثرہ مقامات کو محفوظ بنانے کے لیے سیکیورٹی فورسز نے گوادر شہر اور گردونواح میں کلیئرنس آپریشنز شروع کیے۔ مختلف جھڑپوں کے دوران دہشت گردوں کے عزائم ناکام بنا دیے گئے اور ریاست کی عمل داری کو کمزور کرنے کی کوششوں کا مؤثر جواب دیا گیا۔
آئی ایس پی آر کا کہنا ہے کہ تمام آپریشنز سیکیورٹی فورسز کے کسی جانی نقصان کے بغیر مکمل کر لیے گئے، جبکہ علاقے میں امن و امان اور ریاست کی عمل داری بحال کر دی گئی۔
خاتون دہشت گرد کی شمولیت پر آئی ایس پی آر کا مؤقف
آئی ایس پی آر نے اپنے بیان میں ایک بلوچ خاتون کو حملے میں زبردستی شامل کیے جانے کی مذمت کرتے ہوئے کہا کہ خواتین کو دہشت گردی اور پروپیگنڈے کے لیے استعمال کرنا ان کی حرمت اور احترام کے منافی ہے۔ بیان کے مطابق دہشت گرد عوامی جذبات بھڑکانے اور اپنی کارروائیوں کو جواز فراہم کرنے کے لیے بلوچ خواتین کا استحصال کر رہے ہیں۔
ترجمان پاک فوج کے مطابق ایسی کارروائیاں بلوچ اور اسلامی روایات کے منافی ہیں، جن میں خواتین کو عزت و احترام حاصل ہے۔ آئی ایس پی آر نے کہا کہ بلوچستان کے عوام ان عناصر کو مسترد کرتے آئے ہیں جو ان کے نام پر تشدد اور خونریزی کرتے ہیں، اور وہ دہشت گردوں کے اس طرزِ عمل کو بھی پہچان لیں گے۔
انسدادِ دہشت گردی کی کارروائیاں جاری رکھنے کا عزم
آئی ایس پی آر کے مطابق قومی ایکشن پلان کے تحت وفاقی ایپکس کمیٹی کے منظور کردہ وژن ’’عزمِ استحکام‘‘ کے مطابق انسدادِ دہشت گردی کی مہم پوری رفتار سے جاری رہے گی۔
ترجمان پاک فوج نے اس عزم کا اعادہ کیا کہ سیکیورٹی فورسز اور قانون نافذ کرنے والے ادارے ملک میں غیر ملکی سرپرستی اور حمایت یافتہ دہشت گردی کے خاتمے کے لیے پُرعزم ہیں۔ بیان کے مطابق بلوچستان میں امن، استحکام اور ترقی کے لیے کارروائیاں جاری رکھی جائیں گی۔
