آئندہ وقتوں میں موسمیاتی تبدیلی بڑا چیلنج ہوگی، آب و ہوا صاف رکھ، زیادہ درخت لگا کر آئندہ نسلوں کے مستقبل کو محفوظ بنایا جاسکتا ہے، سیلفی ود اے ٹری کے نام سے شجرکاری مہم شروع کررہے ہیں، شہری زیادہ سے زیادہ درخت اور پودے لگائیں، تقریب سے خطاب
اسلام آباد (الفجرآن لائن) وفاقی وزیر اطلاعات عطاء تارڑ نے کہا ہے کہ پاکستان کا کاربن اخراج میں حصہ 2 فیصد، نقصان 90فیصد برداشت کرتا ہے، مدد زائد کاربن اخراج کرنیوالے ممالک کی ذمہ داری ہے، آئندہ وقتوںمیں موسمیاتی تبدیلی بڑا چیلنج ہوگی، آب و ہوا صاف رکھ ، زیادہ درخت لگا کر آئندہ نسلوں کے مستقبل کو محفوظ بنایا جاسکتا ہے، سیلفی ود اے ٹری کے نام سے شجرکاری مہم شروع کررہے ہیں، شہری زیادہ سے زیادہ درخت اور پودے لگائیں۔تفصیلات کے مطابق سی ڈی اے کے زیر اہتمام مارگلہ ہلز میں شجر کاری مہم بارے منعقدہ تقریب سے خطاب کرتے ہوئے وفاقی وزیر اطلاعات عطاء تارڑ نے کہا کہ اسلام آباد کا شمار دنیا کے خوبصورت ترین شہروں میں ہوتا ہے، خوبصورت دارالخلافہ سے نوازنے پر اللہ کے شکر گزار ہیں۔انہوں نے کہا کہ مارگلہ نیشنل پارک اسلام آباد کی پہچان ہے جس پر فخر ہے۔ انہوں نے کہا کہ درخت زندگی کی علامت ہیں، درخت ہیں تو ہم ہیں، دنیا کے بیشتر ممالک دوسرے ممالک سے درخت اور گھاس درآمد کر کے اپنے ملک میں لگاتے ہیں، ہم خوش نصیب ہیں کہ ہمارا زیادہ وقت اسلام آباد میں گزرتا ہے، اسلام آباد میں ہوا کا معیار باقی شہروں سے بہتر ہے، یہاں زیادہ سے زیادہ درخت لگانے سے ماحول میں مزید بہتری آئے گی۔ انہوں نے کہاکہ حکومت سیلفی ود اے ٹری کے نام سے شجرکاری مہم شروع کررہی ہے ،شہریوں سے گزارش ہے کہ وہ زیادہ سے زیادہ درخت اور پودے لگائیں۔ انہوں نے کہا کہ دنیا کے کئی ممالک گرین روف ٹاپ کی طرف جا رہے ہیں، اسلام آباد میں روف ٹاپ پر بے پناہ جگہ موجود ہے جہاں پودے اور درخت لگائے جا سکتے ہیں، ہمیں اسلام آباد میں گرین روف ٹاپ پراجیکٹ شروع کرنا چاہئے ، اقدام سے اسلام سرسبز وشاداب نظر آئے گا۔ انہوں نے کہا کہ ہمیں سکولوں ،کالجز سمیت دیگر جگہوں پر شجرکاری مہم کی حوصلہ افزائی کرنا ہوگی۔انہوں نے کہا کہ ٹریک یوئر ٹری کے نام سے جلد ایپلی کیشن لانچ کی جائیگی اس کی ویب سائیٹ پہلے سے موجود ہے، ایپلی کیشن کے ذریعے شہری اپنے لگائے گئے پودے یا درخت کی نشوونما اور بڑھوتری دیکھ سکیں گے۔ انہوں نے کہا کہ میڈیا معاشرے کی ذہن سازی ،مسائل کو اجاگر کرتا ہے، تمام ٹی وی چینلز دفاتر میں ٹری پلانٹیشن مہم کا آغاز کریں ، عوام میں درخت لگانے کی اہمیت بارے آگاہی پیدا کرنے کیلئے ٹاک شوز میں خصوصی پروگراموں کا انعقاد کیا جائے ۔انہوں نے کہا کہ اگر اس کام کو تیزی اور تندہی سے نہ کیا گیا تو خدانخواستہ ایک وقت آئے گا کہ ہمیں سانس کیلئے آکسیجن سلنڈرز اٹھانے پڑیں گے۔ انہوں نے کہا کہ آب و ہوا کو صاف رکھ ، زیادہ درخت لگا کر ہی ہم آئندہ نسلوں کے مستقبل کو محفوظ بنا سکتے ہیں۔انہوں نے کہا کہ مارگلہ نیشنل پارک میں آتشزدگی واقعات سے کافی نقصان ہوا تاہم سی ڈی اے، وزارت موسمیاتی تبدیلی، فائر بریگیڈ، محکمہ جنگلات ٹیموں نے جان کی پرواہ نہ کر کے آگ بجھائی۔ انہوں نے کہا کہ آئندہ وقتوں میں موسمیاتی تبدیلی بڑا چیلنج ہوگا،ہمارے یہاں آنیوالے سیلابوں، ہوا کے معیار کے خراب ہونے میں ہمارا قصور نہیں،پاکستان کا کاربن اخراج میں حصہ صرف2 فیصد ہے مگر نقصان 90فیصد بردداشت کرتا ہے ،پاکستان کے ساتھ تعاون زائد کاربن اخراج کرنیوالے ممالک کی ذمہ داری ہے۔ انہوں نے کہا کہ موسمیاتی تبدیلی پوری انسانیت کا مسئلہ ہے، انسانیت و مستقبل کی نسلوں کی خاطر ہمیں بڑھ چڑھ کر شجرکاری میں حصہ لینا ہوگا اور قومی ذمہ داری ،آنیوالی نسلوں کا مسئلہ سمجھ کر سنجیدگی سے انجام دینا ہوگا۔
