گرین ٹریکٹر مفت بذریعہ قرعہ اندازی دینے کا اعلان
لاہور (الفجرآن لائن) وزیراعظم پنجاب مریم نواز نے سی ایم پنجاب گرین ٹریکٹر سکیم کا آغاز کرتے ہوئے 25سے 50ایکڑ اراضی پر گندم کے کاشتکاروں کو 1ہزار گرین ٹریکٹر مفت بذریعہ قرعہ اندازی دینے کا اعلان کردیا۔ جمعہ کو وزیراعلی پنجاب مریم نواز نے گرین ٹریکٹر پروگرام کی ڈیجیٹل بیلٹنگ کی۔اوکاڑہ کے محمد یاسین ولد محمد اشرف گرین ٹریکٹر حاصل کرنیوالے پہلے، چکوال کے طالب حسین ولد محمد حسین دوسرے جبکہ ڈیرہ غازی خان کے غلام اکبر ولد حاجی غلام حسین گرین ٹریکٹر حاصل کرنیوالے تیسرے کاشتکار ہیں۔اس موقع پر وزیراعلی پنجاب مریم نواز نے گرین ٹریکٹر حاصل کرنیوالے تمام کاشتکاروں کو مبارکباد دی اور کاشتکاروں میں تقسیم کئے جانیوالے 4اقسام کے گرین ٹریکٹرز کا معائنہ کیا اور ٹریکٹر پر سوار ہو کر اس کی خصوصیات کا جائزہ لیا۔ مریم نواز نے ٹریکٹر ڈرائیونگ کو خوشگوار تجربہ قرار دیتے ہوئے 25سے 50ایکڑ اراضی پر گندم کے کاشتکاروں کو 1ہزار گرین ٹریکٹر قرعہ اندازی کے ذریعے مفت دینے کا اعلان کیا۔ انہوں نے کہا کہ پنجاب میں زراعت کو میکانائزیشن کے جدید دور میں داخل کرنا چاہتے ہیں۔ واضح رہے کہ منصوبے کے تحت اوکاڑہ میں 339، چکوال میں 111اور ڈی جی خان میں 276کاشتکاروں کو گرین ٹریکٹر دیئے جائینگے۔ وزیراعلی گرین ٹریکٹر سکیم کے تحت 9500کاشتکاروں کو ہر ٹریکٹر پر 10لاکھ روپے سبسڈی دی جارہی ہے۔
