شاہین آفریدی آئی سی سی کی ون ڈے رینکنگ میں پہلے نمبر پر

افغانستان کے لیگ اسپنر راشد خان دوسرے نمبر پر براجمان
 دبئی (الفجر آن لائن) پاکستان ٹیم کے فاسٹ بولر شاہین شاہ آفریدی آئی سی سی کی ون ڈے رینکنگ میں پہلے نمبر پر آگئے۔شاہین شاہ آفریدی نے اپنی بہترین بولنگ سے جنوبی افریقا کے اسپنر کیشو مہاراج کو تیسری نمبر پر دھکیل دیا تاہم افغانستان کے لیگ اسپنر راشد خان دوسرے نمبر پر براجمان ہیں۔اس کے ساتھ، آسٹریلیا کے خلاف سیریز میں 10 وکٹیں حاصل کرنے والے حارث روف 13ویں پوزیشن پر پہنچ گئے۔ حارث روف کو پلیئر آف دی سیریز کا ایوارڈ بھی دیا گیا تھا۔بلے بازوں کی ون ڈے رینکنگ میں پاکستان کے تجربہ کار بلے باز بابراعظم پہلے نمبر پر براجمان ہیں۔یاد رہے آسٹریلیا کے خلاف حالیہ ون ڈے سیریز کے دوران شاہین شاہ آفریدی نے بہترین بولنگ کرتے ہوئے 8 وکٹیں حاصل کی تھیں۔ انہوں نے سال بھر کے طویل وقفے کے بعد بولرز کی رینکنگ میں دوبارہ پہلا نمبر حاصل کیا ہے۔