اسلام آباد(الفجر آن لائن) پارلیمنٹ کا مشترکہ اجلاس پیر 16دسمبر کو طلب کرنے کا فیصلہ کیا گیا ہے،اجلاس میں صدرمملکت کی طرف سے واپس بھجوائے گئے 8بل زیر غور آئیں گے۔ زرائع کے مطابق اجلاس میں مدرسہ رجسٹریشن سے متعلق“سوسائیٹیز ترمیمی بل”پر بھی غور کیا جائے گا، سوسائٹیز ترمیمی بل صدر مملکت کی طرف سے پارلیمنٹ کو واپس بھیجا گیا تھا،اجلاس میں ایسے بل بھی زیر غور آئیں گے جو کسی ایک ایوان سے منظور کئے گئے لیکن مقررہ وقت میں دوسرے ایوان نے منظور نہیں کئے۔
زرائع کے مطابق صدر مملکت کی طرف سے واپس بھجوائے جانے والے بلوں میں سے بعض سابق صدر عارف علوی نے اعتراضات کے ساتھ بھیجے تھے، وزارت قانون کی طرف سے سوسائٹیز ترمیمی بل میں مزید ترامیم لائی جائیں گی، اجلاس میں اھم قانون سازی کی جائے گی، زرائع کے مطابق نارکوٹکس کنٹرول بل، جنریشن اینڈ ڈسٹری بیوشن آف الیکٹرک پاور سمیت کئی بل قانون سازی کیلئے پیش ہوں گے۔عرفان صدیقی کا کوڈ آف کریمنل پروسیجر سے متعلق بل بھی اس میں شامل ہے۔
