رائٹ سائزنگ سے متاثر ہونے والے بیوروکریٹس کے مستقبل کیلئے حکومت کا اہم فیصلہ

اسلام آباد ( الفجر آن لائن)رائٹ سائزنگ سے متاثر ہونے والے بیوروکریٹس کے مستقبل کے لئے حکومت کا اہم فیصلہ سامنے آیا ہے،سول سرونٹس ترمیمی بل 2024 قومی اسمبلی میں پیش، قائمہ کمیٹی کے سپرد کر دیا گیا۔ ترمیمی بل کے تحت اداروں کی رائٹ سائزنگ کے نتیجے میں سرپلس پول میں جانے والے بیوروکریٹ کو دوسرے محکمے میں مساوی پوسٹ پر تعینات کیا جائے گا۔

مساوی پوسٹ دستیاب نہ ہونے کی صورت میں نچلی سطح کی پوسٹ پر بھی تعینات کیا جا سکے گا۔نچلی سطح کی پوسٹ پر تعینات ہونے کی صورت میں بیوروکریٹ کو تنخواہ اور مراعات گزشتہ پوسٹ کی ادا کی جائیں گی۔اداروں کی بندش کی صورت میں سرپلس پول میں جا نے والے افسران کو خصوصی پیکج دیا جائے گا۔خصوصی پیکج سے مطمئن نہ ہونے والا بیوروکریٹ سات دنوں میں مصالحتی کمیٹی کے سامنے پیش کرے گا۔ وفاقی حکومت نوٹیفیکیشن کے ذریعے افسران کی شکایتوں کے ازالے کے لئے مصالحتی کمیٹی تشکیل دے گی۔ کمیٹی تیس دنوں میں شکایت کنندہ بیوروکریٹ پر فیصلہ کرنے کی پابند ہو گی۔کمیٹی کا فیصلہ ملک کی کسی بھی عدالت میں چیلنج نہیں کیاجا سکے گا۔ملازمت سے برطرف ہونے والا بیوروکریٹ خصوصی پیکج کا حقدار نہیں ہو گا۔