اسلام آباد(الفجرآن لائن)وزارت انسداد منشیات نے بلوچستان میں افیون (بھنگ) کی کاشت کی اجازت دینے کے بارے میں سوشل میڈیا پر جاری ایک خط کومکمل من گھڑت اور جعلی قرار دیا ہے۔ ایک بیا ن میں وزارت انسداد منشیات نے کہا کہ وزارت کو معلوم ہوا ہے کہ بلوچستان کے چند اضلاع میں افیون (بھنگ) کی کاشت کی اجازت دینے کا ایک جھوٹا اور جعلی خط مختلف سوشل میڈیا پلیٹ فارمز پر گردش کر رہا ہے۔بیان میں کہا گیا ہے کہ وزارت انسداد منشیات واضح کرتی ہے کہ بلوچستان یا کسی دوسرے خطے میں افیون (بھنگ) کی کاشت کیلئے نہ تو ایسی منظوری دی گئی ہے اور نہ ہی کوئی پالیسی موجود ہے۔ یہ خط مکمل طور پر من گھڑت اور جعل سازی کا نتیجہ ہے۔وزارت انسداد منشیات، قانون کے مطابق ملک کے تمام علاقوں میں منشیات کی غیرقانونی پیداوار اور سمگلنگ سے نمٹنے کیلئے اپنے عزم کا اعادہ کرتی ہے۔
