شہری خوفزدہ ہوکر کلمہ طیبہ کا ورد کرتے گھروں ،دفاتر سے باہر نکل آئے
پشاور (الفجر آن لائن)خیبرپختونخوا اور آزاد کشمیر کے مختلف علاقوں میں 5.2شدت زلزلے کے جھٹکے محسوس کئے گئے جس کے باعث شہری خوفزدہ ہوکر گھروں اور دفاتر سے باہر نکل آئے۔ اطلاعات کے مطابق خیبرپختونخوا اور آزاد کشمیر کے مختلف شہروں پشاور، سوات ،شمالی وزیرستان، وانا، کرک، مظفر آباد، کوٹلی سمیت دیگر علاقوں زلزلے کے جھٹکے محسوس کئے گئے ۔ زلزلہ پیما مرکز کے مطابق ریکٹر سکیل پر زلزلے کی شدت 5.2ریکارڈ کی گئی جس کی زیر زمین گہرائی 212 کلومیٹر تھی۔زلزلہ پیما مرکز کے مطابق زلزلے کا مرکز پاک افغان، تاجکستان کا سرحدی علاقہ تھا۔ زلزلے کے باعث عوام خوف وہراس میں مبتلا ہو کر کلمہ طیبہ کا ورد کرتے گھروں اور دفاتر سے باہر نکل آئے ، تاحال زلزلے سے کسی جانی و مالی نقصان کی اطلاع موصول نہیں ہوئی ہے۔
