لوگوں کے بھیڑ بکریاں بننے سے انکار پر ظلم کا نظام ختم ہوگا، لاپتہ افراد کا پیچھا سیاسی نہیں، انسانیت کے طور پر کررہے، والدین پوچھ رہے ہیں،میڈیا سے گفتگو
راولپنڈی(الفجرآن لائن) بانی پی ٹی آئی کی ہمشیرہ علیمہ خان نے عمران خان کے دو مطالبات پیش کرتے ہوئے کہا ہے اگر حکومت نے مطالبات نہ مانے تو بانی پی ٹی آئی آئندہ جمعہ سول نافرمانی کی کال دیں گے۔ اڈیالہ جیل کے باہر میڈیا سے گفتگو کرتے ہوئے بانی پی ٹی آئی کی ہمشیرہ علیمہ خان نے کہا کہ حکومت نے لوگوں کو ڈرایا، گھروں کو توڑا، خواتین کیساتھ وہ کیا جو پہلے نہیں ہوا۔ نہوں نے کہا کہ 26نومبر کو سنائپر کے ذریعے لوگوں کو شہید کیا گیا، 150 افراد اب بھی لاپتہ ہیں۔ انہوں نے کہا کہ جمہوریت قومی اسمبلی، عدلیہ اور میڈیا پر کھڑی ہے، ان تینوں چیزوں کو زمین بوس کر دیا گیاہے، اس نظام میں کوئی سرمایہ کاری نہیں آئے گی آگے کے دن بہت برے ہیں، بجلی گھر انہی لوگوں کے ہیں جو ملک کو کنٹرول کر رہے ہیں۔ انہوں نے بتایا کہ بانی پی ٹی آئی عمران خان نے دو مطالبات رکھے ہیں پہلا سپریم کورٹ ججز کے نیچے جے آئی ٹی بنائی جائے جو9مئی اور 26نومبر کے سانحات کی تحقیقات کرے اور جناح ایونیو آپریشن میں گرفتار تمام کارکنوں کو رہا کیا جائے۔انہوں نے کہا کہ حکومت نے مطالبات نہ مانے تو عمران خان آئندہ جمعہ سول نافرمانی کی کال دیں گے، پہلے مرحلے میںاوورسیز پاکستانیوں سے پیسے نہ بھیجنے کی اپیل کی جائے گی۔ انہوں نے بتایا کہ بانی پی ٹی آئی نے کہاہے کہ اگر اسٹیبلشمنٹ مذاکرات کیلئے آفر دیتی ہے تو پی ٹی آئی کی مذاکراتی کمیٹی ان سے مذاکرات کرے گی۔بیرسٹر گوہر سے ہونیوالی تلخ کلامی پر علیمہ خان نے کہا کہ میرا اعتراض ہے کہ صرف 12لوگ شہید نہیں ہوئے، بہت سے لوگ لاپتا ،جیلوں میں ہیں، ان کے والدین پوچھ رہے ہیں، ہم سیاسی طور پر نہیں انسانیت کے طور پر ان کا پیچھا کر رہے ہیں۔ انہوں نے کہا کہ لوگ بھیڑ بکریاں بننے سے انکار کریں گے تو ظلم کا نظام ختم ہو جائے گا۔
