سوراب اور مستونگ میں کامیاب آپریشنز: وزیر اعلیٰ بلوچستان کا سیکیورٹی فورسز کو زبردست خراج تحسین
کوئٹہ( الفجرآن لائن) وزیر اعلیٰ بلوچستان میر سرفراز بگٹی نے سوراب اور مستونگ میں کامیاب انٹیلی جنس بیسڈ آپریشنز پر سیکیورٹی فورسز کو زبردست خراج تحسین پیش کیا ہے۔ اپنے ایک بیان میں انہوں نے کہا کہ قانون نافذ کرنے والے اداروں نے بروقت کارروائی کرتے ہوئے دہشت گردوں کے ٹھکانوں کو تباہ کیا اور خودکش حملوں کی منصوبہ بندی میں ملوث خطرناک عناصر کو گرفتار کیا۔ وزیر اعلیٰ نے اس کامیاب کارروائی کو سیکیورٹی اداروں کی ایک بڑی اور نمایاں کامیابی قرار دیا ہے۔
میر سرفراز بگٹی نے واضح کیا کہ بلوچستان کے امن و امان کو سبوتاژ کرنے کی کسی بھی ناپاک سازش کو کامیاب نہیں ہونے دیا جائے گا۔ انہوں نے دوٹوک الفاظ میں کہا کہ ریاست دشمن عناصر کے ساتھ کسی قسم کی رعایت نہیں برتی جائے گی۔ وزیر اعلیٰ کا کہنا تھا کہ بھارت کی سرپرستی میں ملک دشمن سرگرمیوں میں مصروف دہشت گردوں اور ان کے سہولت کاروں کے نیٹ ورک کا گھیراؤ تنگ کر دیا گیا ہے اور ان کے خلاف یہ کارروائیاں منطقی انجام تک بلا تعطل جاری رہیں گی۔
وزیر اعلیٰ بلوچستان نے صوبائی حکومت کے عزم کو دہراتے ہوئے کہا کہ صوبے سے دہشت گردی کے مکمل خاتمے تک حکومت سیکیورٹی فورسز اور دیگر قانون نافذ کرنے والے اداروں کے شانہ بشانہ کھڑی رہے گی۔ انہوں نے مزید کہا کہ بلوچستان میں مستقل امن، استحکام اور عوام کے جان و مال کا تحفظ موجودہ حکومت کی اولین ترجیح ہے۔ دہشت گردی کے اس ناسور کو جڑ سے اکھاڑ پھینکنے کے لیے حکومت تمام دستیاب وسائل بروئے کار لا رہی ہے اور یہ جنگ پوری قوت سے لڑی جائے گی۔ میر سرفراز بگٹی نے کہا کہ فورسز کی قربانیاں اور کامیابیاں پوری پاکستانی قوم کے لیے باعث فخر ہیں۔
