ٹیرف بڑھانے بارے حکومتی درخواست من وعن منظور نہ کر کے عوام کو 260 ارب روپے کا ریلیف دیا
اسلام آباد (الفجرآن لائن) چیئرمین نیپرا نے کہا ہے کہ حکومت کی جانب سے بھیجی جانیوالی سمری کی منظوری کا تاثر درست نہیں، ٹیرف بڑھانے بارے حکومتی درخواست من وعن منظور نہ کر کے عوام کو 260 ارب روپے کا ریلیف دیا ۔ تفصیلات کے مطابق نیپرا ہیڈ آفس میں کے الیکٹرک کی مئی اور جون کی فیول پرائس ایڈجسٹمنٹ بارے درخواست پر سماعت ہوئی۔
دوران سماعت چیئرمین نیپرا نے کہا کہ یہ تاثر درست نہیں حکومت جو سمری بھیجتی ہے نیپرا اسی کی منظوری دے دیتا ہے۔انہوں نے کہا کہ ہماری ربڑ اسٹمپنگ کسی چیز پر نہیں ہے، نیپرا کو وفاقی حکومت کی 8روپے 28پیسے فی یونٹ بنیادی ٹیرف بڑھانے کی درخواست آئی تھی، وفاقی حکومت کی درخواست پر اوسط ٹیرف 5 روپے 72پیسے فی یونٹ بڑھانے کی اجازت دی۔انہوں نے کہا کہ نیپرا نے وفاقی حکومت کی درخواست من وعن منظوری نہ کر کے عوام کو260 ارب روپے کا ریلیف دیا۔
