زرعی ترقیاتی بینک، یوٹیلیٹی سٹورزکارپوریشن، سٹیٹ لائف انشورنس، بجلی تقسیم کار کمپنیاں شامل
اسلام آباد (الفجرآن لائن) وفاقی حکومت نے 5 سال کے دوران زرعی ترقیاتی بینک، یوٹیلیٹی سٹورزکارپوریشن، سٹیٹ لائف انشورنس، بجلی تقسیم کار کمپنیوں سمیت 24 اداروں کی نجکاری کا فیصلہ کرلیا۔ وفاقی حکومت نے2024ء سے 2029ء تک 5 سال کے دوران 3 مراحل میں 24 اداروں کی نجکاری کا فیصلہ کرلیا۔ نجکاری پلان کے مطابق پہلے مرحلے میں ایک سال کے دوران 10اداروں کی نجکاری، دوسرے مرحلے میں ایک سے 3 سال کے دوران 13اداروں کی نجکاری جبکہ تیسرے و آخری مرحلے میں 3 سے 5 سال کے دوران ایک ادارے کی نجکاری کی جائے گی۔ نجکاری پلان کے مطابق پہلے مرحلے میں پی آئی اے اور روزویلٹ ہوٹل نیویارک،زرعی ترقیاتی بینک،فرسٹ ویمن بینک،ہاؤس بلڈنگ فنانس کارپوریشن،پاکستان انجینئرنگ کمپنی،سندھ انجینئرنگ کمپنی لمیٹڈ،اسلام آباد، فیصل آباد اورگوجرانوالہ کی بجلی کمپنیوں کی نجکاری کی جائے گی۔ دوسرے مرحلے میں بجلی تقسیم کار کمپنیوں، ناردرن پاورجنریشن، لاکھڑاپاور جنریشن کمپنی، لیسکو،میپکو، حیسکو،سیپکو، پشاور اور ہزارہ الیکٹرک،جام شوروپاورکمپنی اور سینٹرل پاور جنریشن کمپنی کی نجکاری کی جائے گی۔ حکومت نے یوٹیلیٹی سٹورزکارپوریشن، اسٹیٹ لائف انشورنس اورپاکستان ری انشورنس کمپنی کی نجکاری بھی دوسرے مرحلے میں کرنے کا فیصلہ کیا ہے۔ دستاویزات کے مطابق پلان کے آخری مرحلے میں پوسٹل لائف انشورنس کمپنی کی نجکاری کاعمل مکمل کیاجائے گا۔
