اسلام آباد(الفجر آن لائن) الیکشن کمیشن نے توہین الیکشن کمیشن کیس میں عمران خان کی آئندہ سماعت پر حاضری یقینی بنانے کا حکم دے دیا۔ جمعرات کو الیکشن کمیشن میں ممبر سندھ نثار درانی کی سربراہی میں 4رکنی کمیشن نے بانی پی ٹی آئی عمران خان کیخلاف توہین الیکشن کمیشن و الیکشن کمشنر کیس پر سماعت کی۔دوران سماعت ممبر خیبرپختونخوا نے کہا کہ عمران خان کی تو کل ضمانت ہوگئی تھی جس پر ان کے وکیل فیصل چودھری بتایا کہ ان کو کسی اور کیس میں گرفتار کرلیا گیا ہے،تاہم شواہد ریکارڈ کرنے کیلئے ملزم کی حاضری ضروری ہوتی ہے۔حکام نے بتایا کہ بانی پی ٹی آئی کی ویڈیولنک سے حاضری کا بندوبست ہوجائے گا جس پر الیکشن کمیشن نے ہدایت کی کہ آئندہ سماعت پر عمران خان کی ویڈیو لنک سے حاضری یقینی بنائی جائے۔ممبر سندھ نثار درانی نے کہا کہ الیکشن کمیشن آئندہ سماعت پر شواہد و گواہوں کے بیان ریکارڈ کرے گا۔ بعد ازاں کمیشن نے کیس کی مزید سماعت 17دسمبر تک ملتوی کردی۔
