حکومت کو گورنر راج کا شوق نہیں، مجبور کیا جارہا، طلال چودھری

پی ٹی آئی مذاکرات کو ہماری کمزوری سمجھ بیٹھی ہے، آنکھیں کھلی ہیں دیکھ رہے ہیں کون سا اشتہاری کہاں چھپا ہے؟، نجی ٹی وی سے گفتگو
اسلام آباد (الفجر آن لائن) مسلم لیگ (ن) کے رہنماء طلال چودھری نے کہا ہے کہ حکومت کو گورنر راج جیسے فیصلے کا شوق نہیں، مجبور کیا جارہا،پی ٹی آئی مذاکرات کو ہماری کمزوری سمجھ بیٹھی ہے، آنکھیں کھلی ہیں دیکھ رہے ہیں کون سا اشتہاری کہاں چھپا ہے؟۔نجی ٹی وی پروگرام میں گفتگو کرتے ہوئے لیگی رہنماء طلال چودھری نے کہا کہ پی ٹی آئی حکومت نیشنل ایکشن پلان پر عمل نہیں کر رہی ہے، ہم سیاسی حکومت ہیں گورنر راج جیسے فیصلے کرنے کا شوق نہیں لیکن مجبور کیا جا رہا ہے،یہ ان کیلئے آخری وارننگ ہے۔

انہوں نے کہا کہ بشری بی بی ،علی امین کے وارنٹ نکلے تھے، حکومت کی آنکھیں کھلی ہیں دیکھ رہی ہے کہ کون سا اشتہاری کہاں چھپا ہوا ہے؟۔ انہوںنے کہا کہ26ویں آئینی ترمیم پر جو اتحادی نہیں بھی تھے ان کو ٹیبل پر بٹھایا تھا، پی ٹی آئی مذاکرات کو ہماری کمزوری سمجھ بیٹھی۔ انہوں نے کہا کہ مسائل پر بات ہوسکتی ہے لیکن این آر آو پر نہیں، ہم بلاول بھٹو کی بات غور سے سنتے ہیں ان کی نشاندہی اہم ہوتی ہے۔