سب سے پہلے فٹنس سرٹیفکیٹ کا اطلاق سرکاری گاڑیوں پر لاگو کروا رہے ہیں یہ ممکن نہیں لوگوں کو روکیں ،سرکار سوئی رہے، بلال اکبر خان
لاہور (الفجر آن لائن) حکومت پنجاب نے سموگ تدارک اقدامات کے تحت بغیر فٹنس سرٹیفکیٹ گاڑیوںکو ایم ٹیگ جاری نہ کرنے کا فیصلہ کرلیا۔ ذرائع کے مطابق حکومت پنجاب سموگ تداراک اقدامات کے تحت 30 سال سے زائد عرصہ چلنے والی گاڑیوں کے آئندہ اکتوبر تا جنوری لاہور میں داخلے اور موٹر وے پر سفر پر پابندی عائد کردی ہے، ایسی گاڑیوں کو ایم ٹیگ کے حصول کیلئے گاڑی کی رجسٹریشن بک اور لائسنس کیساتھ گاڑی کا فٹنس سرٹیفکیٹ دکھانا لازمی قرار دیا گیا ہے۔
اس حوالے سے وزیر ٹرانسپورٹ پنجاب بلال اکبر خان نے کہا ہے کہ جس طرح کے سموگ زدہ حالات سے ہم گزرے ہیں اسے دیکھتے ہوئے یہ شرط رکھی گئی ہے ہم نے سروسز اینڈ جنرل ایڈمنسٹریشن کو خط لکھ دیا ہے جس میں سرکاری گاڑیوں کی تفصیلات طلب کی گئی ہیں۔ انہوںنے کہا کہ سب سے پہلے فٹنس سرٹیفکیٹ کا اطلاق سرکاری گاڑیوں پر لاگو کروا رہے ہیں یہ ممکن نہیں کہ لوگوں کو روکیں اور سرکار سوئی رہے، صرف بڑی کمرشل نہیں پرائیویٹ گاڑیوں پر بھی یہ احکامات لاگو ہوں گے۔
