سکیم کے تحت ایک سے 10لاکھ روپے تک لون دیا جائیگا، قرض ادائیگی کی مدت 5 سال ہوگی،نوازشریف آئی ٹی سٹی میں آئی ٹی سٹارٹ اپ کیلئے ترجیحا لون مل سکے گا
لاہور(الفجرآن لائن) وزیر اعلی مریم نواز نے پنجاب میں چھوٹے کاروبار کے فروغ کیلئے ‘کاروبار کارڈ سکیم’ شروع کرنے کا فیصلہ کرلیا جس کے تحت ایک سے 10لاکھ روپے تک لون دیا جائے گا، قرض ادائیگی کی مدت 5 سال ہوگی،نوازشریف آئی ٹی سٹی میں آئی ٹی سٹارٹ اپ کیلئے ترجیحا لون مل سکے گا۔ہفتے کو وزیراعلی پنجاب مریم نواز کی زیر صدارت اجلاس کا انعقاد ہوا ۔وزیراعلی نے درمیانے کاروبار کیلئے چیف منسٹر آسان کاروبار فنانسنگ سکیم شروع کرنے کا اعلان کرتے ہوئے سمال و میڈیم لون سکیم کیلئے جامع پلان طلب کرلیا۔ بزنس کارڈ سکیم کے تحت ایک سے 10لاکھ روپے تک لون دیا جائے گا جبکہ چیف منسٹر آسان کاروبار فنانسنگ سکیم کے تحت تین کروڑ تک قرضے دینے کی تجویز دی گئی ہے۔ اجلاس میں تجارتی سرگرمیوں کے فروغ کیلئے سمال و میڈیم لون بلاسود قرضے کیلئے بڑے شہروں میں سمال اور میڈیم انڈسٹری کیلئے الگ زون مختص کرنے پر اتفاق کیا گیا۔شرکاء نے منتخب تجارتی سیکٹرز پر ترجیحی بنیادوں پر قرضے دینے کی تجویز کا بھی جائزہ لیا ۔ذرائع کے مطابق چیف منسٹر آسان کاروبار فنانسنگ سکیم کے تحت 5سال تک قرض ادا کرنا ہوگا کاروبار کارڈ ریسٹورنٹ سمیت 10ایریاز میں ادائیگی کیلئے استعمال نہیں ہوسکے گا۔ کارڈ کے ذریعے نوازشریف آئی ٹی سٹی میں آئی ٹی سٹارٹ اپ کیلئے ترجیحا لون مل سکے گا۔
