ملزمان کیخلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ،ترجمان
راولپنڈی (الفجرآن لائن) اے این ایف نے مختلف کارروائیوں میں 2کروڑ روپے سے زائد مالیت کی منشیات برآمد کر کے 8 ملزمان کو گرفتار کرلیا۔ترجمان کے مطابق اینٹی نارکوٹکس فورس کا منشیات سمگلنگ کیخلاف تعلیمی اداروں ،مختلف شہروں میں کریک ڈاؤن جاری ہے،7 کارروائیوں کے دوران 8ملزمان کو گرفتار کرکے 2کروڑ روپے سے زائد مالیت کی 300.9کلو گرام منشیات برآمد کی گئی ہے۔حکام کے مطابق الآصف سکوائر کراچی میں ایک ملزم سے 2کلو گرام چرس برآمد کی گئی ، ملزم نے تعلیمی اداروں کے طلباء کو منشیات فروخت کرنے کا اعتراف کیا ہے۔گوادر میں جیوانی سے 245کلو گرام چرس ،برکی روڈ لاہور کے قریب گاڑی کے خفیہ خانوں میں چھپائی گئی 34.8کلو چرس اور 7.2کلو گرام افیون برآمد کرکے 2ملزمان کو گرفتار کرلیا گیا۔رنگ روڈ پشاور میں پشتخارہ چوک کے قریب گاڑی سے 6کلو چرس برآمد کرکے ملزم کو گرفتار کرلیا گیا،سیالکوٹ میں گلوٹیاں موڑ ڈسکہ کے قریب گاڑی کے خفیہ خانوں سے 3کلو آئس برآمد کرکے ملزم کو گرفتار کیا گیا۔اسی طرح مارگلہ روڈ اسلام آباد میں 2ملزمان سے مجموعی طور پر 1.9کلو گرام آئس برآمد ہوئی، برہان ٹول پلازہ اٹک کے قریب ملزم کے قبضے سے 500گرام ہیروئن اور 500گرام آئس برآمد کی گئی۔ ترجمان کے مطابق تمام کارروائیوں میں گرفتار ملزمان کیخلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
