اسلام آباد (الفجر آن لائن) اے ٹی سی اسلام آباد نے ڈی چوک سے گرفتار 19کی 20روزہ جسمانی ریمانڈ کی استدعاء مسترد کرکے 3روزہ جسمانی ریمانڈ پر پولیس کے حوالے کردیا۔ پی ٹی آئی احتجاج کے دوران ڈی چوک سے گرفتار 19ملزمان کو اے ٹی سی جج ابوالحسنات ذوالقرنین کی عدالت میں پیش کیا ۔پراسیکیوٹر راجہ نوید نے عدالت کو بتایا کہ ملزمان کیخلاف تھانہ سیکرٹریٹ میں مقدمہ درج ہے، ملزمان کا مجموعی طور پر 11روزہ جسمانی ریمانڈ حاصل کیا جاچکا ہے جس میں کئی انکشافات سامنے آئے ہیں۔پراسیکیوٹر نے کہا کہ ملزمان کے انکشافات پر دیگر گرفتاریوں کیلئے چھاپے مارے جا رہے ہیں، ملزمان سے ابھی برآمدگیاں کرنی ہیں لہٰذا مزید 20,20دن کا جسمانی ریمانڈ منظور کیا جائے۔ عدالت نے پراسیکیوٹر کی استدعاء مسترد کرتے ہوئے ملزمان کو 3روزہ جسمانی ریمانڈ پر پولیس کے حوالے کردیا۔
