لیفٹیننٹ جنرل (ر)فیض حمیدسے انتشار ، بدامنی ،9مئی سے جڑے پرتشدد واقعات میں ملوث ہونے کی علیحدہ تفتیش جاری ہے،آئی ایس پی آر
راولپنڈی (الفجرآن لائن) لیفٹیننٹ جنرل فیض حمید(ر)کو باضابطہ طور پر چارج شیٹ کر دیا گیا۔ آئی ایس پی آر کے مطابق 12اگست 2024 ء کو پاکستان آرمی ایکٹ کی متعلقہ دفعات کے تحت لیفٹیننٹ جنرل فیض حمید(ر)کیخلاف فیلڈ جنرل کورٹ مارشل کی کارروائی شروع کی گئی،ان چارجز میں سیاسی سرگرمیوں میں ملوث ہونا، آفیشل سکریٹ ایکٹ کی خلاف ورزیاں کرتے ہوئے ریاست کے تحفظ اور مفاد کو نقصان پہنچانا، اختیارات اور سرکاری وسائل کا غلط استعمال اور افراد کو ناجائز نقصان پہنچنانا شامل ہیں۔فیلڈ جنرل کورٹ مارشل کے عمل کے دوران ملک میں انتشار اور بدامنی سے متعلق پرتشدد واقعات میں لیفٹیننٹ جنرل فیض حمید(ر)کے ملوث ہونے سے متعلق علیحدہ تفتیش بھی کی جا رہی ہے۔آئی ایس پی آر نے کہا کہ ان پرتشدد اور بدامنی کے متعدد واقعات میں 9مئی سے جڑے واقعات بھی شامل تفتیش ہیں، ان متعدد پرتشدد واقعات میں مذموم سیاسی عناصر کی ایما اور ملی بھگت بھی شامل تفتیش ہے۔آئی ایس پی آر کے مطابق فیلڈ جنرل کورٹ مارشل کے عمل کے دوران لیفٹیننٹ جنرل فیض حمید (ر)کو قانون کے مطابق تمام قانونی حقوق فراہم کئے جا رہے ہیں۔
