
اسلام آباد (الفجرآن لائن) پاکستان کرکٹ بورڈ کے چیئرمین محسن نقوی نے واضح کیا ہے کہ آئی سی سی چیمپینز ٹرافی ٹورنامنٹ پاکستان کی عزت ہے، کوئی حرف نہیں آنے دیں گے، کرکٹ میں سیاست کے خلاف ہوں، کھیل کو کھیل ہی رہنا چاہیے۔ پی سی بی کی جانب سے گورننگ بورڈ کے اجلاس کے جاری اعلامیہ کے مطابق محسن نقوی کی زیر صدارت پیسی بی گورننگ بورڈ کا 76واں اجلاس اسلام آباد میں ہوا جس میں شرکا کو آئی سی سی چیمپئنز ٹرافی ٹورنامنٹ پر اب تک کی پیش رفت سے آگاہ کیا گیا۔ گورننگ بورڈ کو قذافی سٹیڈیم۔ نیشنل سٹیڈیم اور راولپنڈی سٹیڈیم کی تعمیر نو پر ہونے والی پیش رفت کے بارے بریفنگ دی گئی۔ محسن نقوی نے گورننگ بورڈ کو چیمپئنز ٹرافی سے متعلق اعتماد میں لیا جبکہ گورننگ بورڈ کے اراکین نے آئی سی سی چیمپئنز ٹرافی سے متعلق چئیرمین پی سی بی محسن نقوی کے اصولی موقف کوسراہا۔ چیئرمین پی سی بی نے کہا کہ پہلے دن سے ہی پاکستان اور کرکٹ کی جیت کی بات کر رہا ہوں، پی سی بی چیمپئنز ٹرافی ٹورنامنٹ کے انعقاد کے لیے ہر لحاظ سے تیار ہے جس کی ہر طرح کی تیاریاں مکمل ہیں۔ محسن نقوی نے کہا کہ پاکستان کے اصولی موقف کو ہر کسی نے سراہا ہے۔ تمام ٹیموں کو دل کی اتھاہ گہرائیوں سے خوش آمدید کہیں گے۔ پاکستانی تمام ٹیموں کو اپنے گراؤنڈز پر کھیلتا ہوا دیکھنا چاہتے ہیں۔ کرکٹ میں سیاست کے خلاف ہوں۔ یہ کھیل ہے جس سے کروڑوں شائقین محبت کرتے ہیں۔کھیل کو کھیل رہنا چاہیے۔ چیمپئنز ٹرافی ٹورنامنٹ سے قبل سٹیڈیمز کی تعمیر نو کا کام مکمل ہو جائے گا۔پوری ٹیم دن رات سٹیڈیمز کی تعمیر نو پر محنت سے کام کر رہی ہے۔ اجلاس میں گورننگ بورڈ کا سٹیڈیمز کی تعمیر نو کے کام پر اطمینان کا اظہارکرتے ہوے گزشتہ اجلاس کے فیصلوں کی توثیق کی گئی۔اجلاس میں گورننگ بورڈ کے اراکین۔ چیف آپریٹنگ آفیسر پی سی بی سمیر احمد۔ چیف فنانشل آفیسر جاوید مرتضی۔ پی ایس ایل کے ہیڈ سلمان نصیر اور متعلقہ حکام نے اجلاس میں شرکت کی۔