کوئٹہ اور تربت فضائی رابطوں کے نئے دور میں داخلگورنر بلوچستان جعفر خان مندوخیل نے افتتاح کیا
نئی فضائی سروس بلوچستان کو ملک کے بڑے شہروں سے براہِ راست جوڑے گی
کوئٹہ (الفجرآن لائن) بلوچستان میں فضائی رابطوں کے فروغ اور عوام کو بہتر سفری سہولیات کی فراہمی کی جانب ایک اہم پیش رفت کے طور پر ساؤتھ ایئر لائن نے اپنی پہلی ڈومیسٹک پرواز کا باقاعدہ آغاز کر دیا ہے۔
نئی فضائی سروس کے آغاز سے کوئٹہ اور تربت کو ملک کے بڑے شہروں سے براہِ راست منسلک کرنے میں مدد ملے گی، جس سے نہ صرف مسافروں کو سہولت میسر آئے گی بلکہ تجارت، سیاحت اور علاقائی معاشی سرگرمیوں کو بھی فروغ ملنے کی توقع ہے۔
ساؤتھ ایئر لائن کی افتتاحی تقریب میں گورنر بلوچستان جعفر خان مندوخیل نے باقاعدہ طور پر ایئر لائن کی ڈومیسٹک سروس کا افتتاح کیا۔
اس موقع پر حکام، سول ایوی ایشن کے نمائندوں، کاروباری شخصیات اور دیگر معززین نے شرکت کی۔
حکام کے مطابق نئی فضائی سروس کوئٹہ اور تربت کو ملک کے تمام بڑے شہروں کے ساتھ براہِ راست جوڑے گی، جس سے بلوچستان کے عوام کو تیز، محفوظ اور آرام دہ سفری سہولیات میسر آئیں گی۔
تقریب سے خطاب کرتے ہوئے حکام کا کہنا تھا کہ ساؤتھ ایئر لائن کی یہ سروس صوبہ بلوچستان کے عوام کے لیے ایک اہم سہولت ثابت ہوگی، جبکہ کوئٹہ اور تربت کے شہریوں کو ملک کے دیگر حصوں تک رسائی کے لیے جدید اور مؤثر فضائی رابطہ دستیاب ہوگا۔
انہوں نے کہا کہ فضائی رابطوں میں بہتری سے نہ صرف کاروباری سرگرمیوں اور سرمایہ کاری کے مواقع میں اضافہ ہوگا بلکہ سیاحت کے فروغ اور بلوچستان کی قومی معیشت میں شمولیت کو بھی مزید تقویت ملے گی۔
نئی ایئر لائن سروس کو صوبے میں ٹرانسپورٹ کے شعبے میں ایک مثبت پیش رفت قرار دیا جا رہا ہے۔
