کوئٹہ (الفجرآن لائن) بلوچستان کے ضلع نصیر آباد کے پولیس اسٹیشن میں قیدی کے جاں بحق ہونے کے افسوسناک واقعے پر صوبائی حکومت نے سخت ایکشن لے لیا ہے۔ وزیر داخلہ بلوچستان میر ضیاء اللہ لانگو کے فوری نوٹس لینے کے بعد غفلت اور قانون شکنی کے مرتکب ہیڈ کانسٹیبل جاوید اقبال کے خلاف باقاعدہ مقدمہ درج کر لیا گیا ہے۔ معاون خصوصی برائے داخلہ بابر یوسفزئی کے مطابق، حکومت اس معاملے کی سنگینی سے پوری طرح آگاہ ہے اور قانون کو ہاتھ میں لینے والے کسی بھی اہلکار کے ساتھ کوئی رعایت نہیں برتی جائے گی۔
معاون برائے داخلہ بابر یوسفزئی نے اپنے خصوصی بیان میں واضح کیا ہے کہ ایف آئی آر میں نامزد ملزم ہیڈ کانسٹیبل کے خلاف قانون کے تمام تقاضوں کو پورا کرتے ہوئے بالکل صاف اور شفاف تحقیقات کو یقینی بنایا جائے گا تاکہ انصاف کے نظام پر عوام کا اعتماد بحال رہے۔ انہوں نے مزید کہا کہ وزیر اعلیٰ بلوچستان میر سرفراز بگٹی، وزیر داخلہ میر ضیاء لانگو اور آئی جی پولیس کے وژن کے عین مطابق صوبے کے تمام پولیس اسٹیشنز میں عوام کے لیے ایک پرامن اور دوستانہ ماحول فراہم کیا جائے گا۔ حکومت کا بنیادی ہدف تھانہ کلچر کو تبدیل کرنا ہے، کیونکہ عوام کی جان و مال اور عزت کا تحفظ موجودہ حکومت کی اولین ترجیحات میں شامل ہے
