پاکستانی میزائل پروگرام پر امریکہ کی بیجا تنقید اور پابندیاں

اسلام آباد پاکستانی میزائل پروگرام پر امریکہ کی بیجا تنقید اور پابندیوں کے بعد اسلام آباد نے واشنگٹن میں اپنے سفیر رضوان سعید شیخ کو مشاورت کے لئے بلا لیا۔ذرائع کے مطابق سفیر رضوان سعید شیخ اہم صلاح مشوروں اور ضروری ہدایات کے لئے اسلام آباد پہنچ گئے،رضوان سعید شیخ کی نائب وزیراعظم اسحاق ڈار اور دفتر خارجہ میں پالیسی سازوں سے اہم ملاقاتیں ہوں گی،سفیر رضوان سعید شیخ وزیراعظم شہباز شریف سے بھی ملاقات کریں گے۔ ذرائع کے مطابق سفیر رضوان سعید شیخ وزیراعظم شہباز شریف اور دفتر خارجہ کو واشنگٹن میں حالیہ سفارتی سرگرمیوں، کامیابیوں اور پیشرفت سے آگاہ کریں گے،گذشتہ 3 ماہ کے دوران رضوان سعید شیخ کی امریکی کانگریس کے دونوں ایوانوں کے اراکین سے اہم ملاقاتیں ہوئی ہیں۔رضوان سعید شیخ نے اراکین کانگریس کو پاکستان کے نکتہ نظر سے آگاہ کیا۔ذرائع کے مطابق جنوری 2025 میں ٹرمپ انتظامیہ کے اقتدار سنبھالنے کے پس منظر میں حکومت پاکستان رضوان سعید شیخ کو اہم ہدایت دے گی،ریپبلکن پارٹی کی اقتدار سنبھالنے کے بعد پاکستان پالیسی کیسی ہو گی، دفتر خارجہ اور رضوان سعید شیخ کے درمیان اہم مشاورت ہو گی۔