اسلام آباد حکومت اورپی ٹی آئی کے درمیان مذاکرات میں بڑی پیش رفت سامنے آگئی۔پی ٹی آئی کی مذاکراتی کمیٹی بانی سے ملنے آج (بد ھ کو) اڈیالہ جیل جائے گی جس کی باقاعدہ اجازت بھی مل گئی ہے، فریقین نے بات چیت جاری رکھنے پر اتفاق کیا ہے۔ ذرائع کے مطابق حکومت اورپی ٹی آئی کی مذاکراتی کمیٹیوں کے پہلے اجلاس کے بعد پہلا بڑا بریک تھرو سامنے آیا ہے، پی ٹی آئی کی مذاکراتی کمیٹی تمام ایشوز پرمشاورت کیلئے آج بدھ کو اڈیالہ جائے گی جس کی اجازت بھی مل گئی ہے، کمیٹی بانی پی ٹی آئی کو حکومت سے ابتدائی مذاکرات کے حوالے سے بریف کرے گی۔ تنازعات کے خاتمے کیلئے بانی پی ٹی آئی سے مشاورت کی جائے گی۔ وزیراعلیٰ خیبرپختونخوا علی امین گنڈا پور کرم ایجنسی کی صورتحال پرمصروفیات کے باعث گزشتہ روزمذاکرات میں شریک نہیں ہوئے تھے تاہم وہ آئندہ مذاکراتی کمیٹی کا حصہ ہوں گے،پی ٹی آئی کی جانب سے صاحبزادہ حامد رضا کو مذاکراتی کمیٹی کا آفیشل ترجمان مقرر کردیا گیاہے۔ وہ مذاکراتی عمل سے متعلق تمام معلومات اور پیشرفت میڈیا کودیں گے۔ مذاکراتی کمیٹیوں کا پہلا اجلاس گزشتہ روز ہوا تھا جس میں فریقین نے بات چیت جاری رکھنے پر اتفاق کیا، کمیٹیوں کی اگلی ملاقات دوجنوری کو ہوگی، جس میں اپوزیشن تحریری مطالبات پیش کرے گی۔
