اسلام آباد : سینیٹ قائمہ کمیٹی برائے خزانہ نے نان فائلرز کے بیرون ملک سفر پر پابندی کی تجویز منظور کرلی۔
تفصیلات کے مطابق سینیٹر سلیم مانڈوی والا کی زیرصدارت سینیٹ قائمہ کمیٹی برائے خزانہ کا اجلاس ہوا ۔چیئرمین ایف بی آر ملک امجد زبیر ٹوانہ نے بریفنگ دیتے ہوئے بتایا کہ ٹیکس ریٹرن فائل نہ کرنیوالوں کیخلاف انکم ٹیکس جنرل آرڈر کے تحت کارروائی کی جائے گی تاہم حج، عمرہ، چھوٹے بچوں، طلباء اور نائیکوپ رکھنے والے اوورسیز پاکستانیوں کو استثنیٰ حاصل ہوگا۔ انہوں نے بتایا کہ نان فائلرز کی موبائل سمز، بجلی اور گیس کنکشن بھی منقطع کئے جائیں گے۔
سینیٹر فاروق ایچ نائیک نے کہا کہ نان فائلرز کے بیرون سفر پر پابندی کا مطلب ایگزٹ کنٹرول لسٹ میں نام آنا ہی سمجھا جائے، نان فائلرزپر ودہولڈنگ ٹیکس کی شرح بھی زیادہ ہے، ان کی موبائل سمز اور بزنس بھی بند کیا جا سکتا ہے۔چیئرمین ایف بی آر نے بتایا کہ 5لاکھ نان فائلرز کی فہرست میں سالانہ 20لاکھ سے زائد آمدن والے لوگ ہیں، ماضی یہ لوگ ٹیکس ریٹرن میں اپنی آمدن ظاہر کر چکے ہیں، صرف گاڑی، پلاٹ یا گھر خریدنے کیلئے وقتی فائلر بننے والوں کو بھی اضافی ٹیکس دینا ہوگا۔بعد ازاں کمیٹی نے نان فائلرز کے بیرون ملک سفر پر پابندی کی تجویز منظور کرلی۔
