کراچی (الفجرآن لائن)اینٹی ہیومن ٹریفکنگ سرکل کراچی نے جعلی کمپنی کے نام پر شہریوں کو بیرون ملک بھجوانے میں ملوث 2ملزمان گرفتار کرلئے۔تفصیلات کے مطابق اینٹی ہیومن ٹریفکنگ سرکل کراچی نے طارق روڈ پر کارروائی کرتے ہوئے جعلی کمپنی کے نام پر شہریوں کو بیرون ملک بھجوانے میں ملوث 2ملزمان عمر عاصم اور حارث خان کو گرفتار کرلیا۔
حکام کے مطابق ملزمان امگرا لمیٹڈ کے نام سے ہیلتھ کنسلٹینسی فرم چلا رہے تھے۔امیگریشن حکام کے مطابق ملزمان نے شکایت کنندہ سے مجموعی طور پر 70لاکھ روپے بٹورے اور اب تک جعلی کمپنی کے نام پر 40شہریوں کو ویزے دے چکے ہیں۔ حکام کے مطابق ملزمان سے چیک بکس، سٹیمپ پیپر، وزیٹنگ کارڈز ،لیپ ٹاپ، موبائل فون اور متعدد سفری دستاویزات بھی برآمد کی گئی ہیں جبکہ ملزمان کے دیگر ساتھیوں کی گرفتاری کیلئے چھاپے مارے جا رہے ہیں۔
