
دہشت گردی کے خاتمے تک جنگ جاری رکھیں گے، قوم ملک کولعنت سے پاک کرنے کیلئے افواج پاکستان کے شانہ بشانہ کھڑی ہے، شہباز شریف
اسلام آباد (الفجرآن لائن) وزیراعظم شہباز شریف نے جنوبی وزیرستان میں دہشت گردوں کا مقابلہ کرتے ہوئے شہید ہونیوالے فوجی جوانوں کو خراج عقیدت پیش کرتے ہوئے کہا ہے کہ ملک سے دہشت گردی کے خاتمے تک اس کیخلاف جنگ جاری رکھیں گے، قوم ملک کو دہشت گردی کی عفریت سے پاک کرنے کیلئے افواج پاکستان کے شانہ بشانہ کھڑی ہے۔
تفصیلات کے مطابق وزیراعظم شہباز شریف نے جنوبی وزیرستان میں دہشت گردوں سے مقابلے کے دوران جام شہادت نوش کرنیوالے سپاہی اسد اللہ، سپاہی محمد صفیان اور این سی بی زین علی کو خراج عقیدت پیش کرتے ہوئے شہداء کی مغفرت اور اہل خانہ کیلئے صبر جمیل کی دعاء کی ہے۔ وزیراعظم نے کہا کہ پاک فوج کے جوانوں نے جرات و بہادری کی مثال قائم کرتے ہوئے وطن عزیز کو دہشت گردی کی لعنت سے پاک کرنے کیلئے جام شہادت نوش کیا۔ انہوں نے کہا کہ ملک سے دہشت گردی کے خاتمے تک اس کیخلاف جنگ جاری رکھیں گے۔ انہوں نے کہا کہ قوم ملک کو دہشت گردی کی عفریت سے پاک کرنے کیلئے متحد ہو کر افواج پاکستان کے شانہ بشانہ کھڑی ہے۔