بغداد (الفجر آن لائن) عراق کی مسلح تنظیم حرکت حزب اللہ النجباء کے سربراہ اکرم الکعبی نے مشترکہ سعودی-امریکی حملوں کا بدلہ لینے کا اعلان کیا ہے۔امریکی سعودی حملوں میں ملک کی پاپولر موبلائزیشن فورسز (PMF) کے ٹھکانوں کو نشانہ بنایا گیا تھا، جن میں یہ گروپ بھی شامل ہے۔
ایک بیان میں اکرم الکعبی نے کہا کہ سعودی عرب کے ساتھ سفارت کاری بے فائدہ ہے اور پی ایم ایف کے ٹھکانوں پر ہونے والے حملوں کا بدلہ لینے کے لیے سعودی عرب کو موزوں فوجی جواب کے ذریعے قابو میں لانا ضروری ہے۔
انہوں نے کہا کہ میزائل کا جواب صرف میزائل سے دیا جا سکتا ہے، اور آگ کا مقابلہ صرف آگ سے کیا جا سکتا ہے۔سعودی عرب اور امریکی سینٹرل کمانڈ نے گزشتہ ماہ کہا تھا کہ مشترکہ فضائی حملوں میں عراق میں موجود ان مسلح گروہوں کو نشانہ بنایا گیا
جو امریکی فوجیوں اور سعودی توانائی کے بنیادی ڈھانچے پر حملوں کے ذمہ دار تھے۔عراق کے نیم فوجی دستے پاپولر موبلائزیشن فورسز نے کہا کہ ان حملوں میں اس کے کم از کم 20 ارکان ہلاک اور 32 زخمی ہوئے۔
